Nongpoh, Nohprah 19: Shuwa ban jam sha ka jinglehkmen ban rakhe ka Christmas kaba dei kata ka sngi ba ngi ngeit ïa ka jingwan longbriew u khun u U Blei, ka Dorbar shnong Saiden ha Ri Bhoi District ka la pynlong da ka jingrakhe ïa kata ka Pre-Christmas kum shi bynta ban pdiang burom ïa kane ka Christmas ban sa rakhe ne sakhi ha satlak jongka pyrthei.
Ïa kane ka jingrakhe Pre-Christmas ka Dorbar shnong Saiden la pynlong ha hynnin ka sngi ha ïing Dorbar ka shnong Saiden bad ba la ïa trei lang ruh da ka CMYC Saiden ba la wan ban shim bynta naduh ki heprit, ki khun samla, ki longkmie longkpa ryngkat ki nongïalam shnong.
U Rangbah Shnong ka Saiden, u Bah E.K Lapang u la shim bynta ruh kum u kongsan kane ka jingrakhe ïa ka Pre-Christmas ha ryngkat ka jingdon lang ka President ka Seng Longkmie, ka Kong B.M Lyngdoh, u President ka Seng Samla Shnong Saiden, u Samla Habamut Lyngdoh ryngkat kiwei kiwei ki riew rangbah na ka shnong Saiden.
Ha kane ka jingrakhe la pynphuh pynphieng ruh da ka jingrwai Christmas ba la rwai da ka Samla Daphinia Kharshanlor ryngkat ki Khynnah pule na ka Chief Minister Youth Centre, Saiden. Kum ka jingpdiang burom ïa ka Christmad bad u snem thymmai, ka Dorbar Shnong Saiden ka la pynlong ruh da ka jingot Cake ba la shim bynta lang da baroh kum ka jinglehkmen ïa ka Christmas.
Haba ai jingkren ha kane ka sngi, u Rangbah shnong ka Saiden, u Bah E.K Lapang, u la pynpaw ïa ka mynsiem jong ka jingkmen ba la lah ban pynlong ïa kane ka jingrakhe ïa ka pre-Christmas hapoh katei ka shnong bad ka thong jong kane ka jingrakhe ka long ba kum ki nongshong shnong ki dei ban pdiang da ka jingkmen ïa ka jinglehkmen Christmas bad ruh na ka bynta u snem thymmai.
U la ong ruh kane ka jingrakhe ïa ka Pre-Christmas kam dei tang ba ki nongshong shnong kin rakhe ïa ka Christmas bad snem thymmai da ka jingsuk ka jingkmen, hynrei ka don ruh ka thong ba kum ka Shnong ka angnud ban wan rah ïa ka jingïatylli na ka bynta ban pdiang burom ïa kane ka jinglehkmen ban sa rakhe ïa ka Christmas bad ruh na ka bynta u snem ba thymmai.
Shuh shuh, u la bynrap ruh da kaba ong ba ka Dorbar Shnong Saiden ka ai khublei kyrpang sha baroh ki nongshong shnong bad khamtam ruh ki samla pule ka CMYC Saiden kiba la ïatrei lang ban pynlong ïa kane ka jingrakhe Pre-Christmas, da ka jingthmu ba kin ïa don lang kawei ka mynsiem ban pdiang burom ïa ka Christmas bad snem thymmai da ka mynsiem jong ka jingsuk jingkmen bad khamtam ba ki nongshong shnong kin dang bit dang biang bad kin dan kiew shaphrang ha baroh ki liang lyngba ka jingkyrkhu kyrduh jong u Blei Nongbuh Nongthaw, u la bynrap.
