Shillong, Nohprah, 19: Ka Sorkar Jylla ka la rai ban weng noh ïa ka kyntien ‘backward classes’ na ka Meghalaya Public Service Commission Regulations.
Ïa kane ka rai ban pynbeit ïa ka kyndon la mynjur da ka Kynhun Myntri ba la pynïaid da u Myntri Rangbah u Conrad K Sangma ha ka sngi Baar.
“Kam don kano kano ka bhah kyrpang ïa kiwei pat ki jaidbynriew ba dang sahdien ha ka jylla jong ngi. Namarkata, ka kyntien kaba don ha ka (MPSC) Rules kam kit jingmut eiei. Namarkata, la shim ïa ka rai mynta ka snig ba kam don kano kano ka bhah kyrpang ïa ki jaidbynriew ba dang sahdien bad kam donkam satia ban don ïa ka kyntien “backward classes” bad namarkata, ngi la weng noh ïa kane ka kyntien “backward classes” naduh mynta ka sngi,” la ong u Sangma ha ka jingïakren bad ki lad pathai khubor.
Ka Kynhun Myntri ka la mynjur ban wanrah ïa ka jingpynbeit thymmai ïa ka Service Rules jong ka Meghalaya Civil Defense and Home Guards.
U Sangma u la ong ba ki don kumba 300-400 tylli ki post kiba thylli.
“Khnang ban dup lah ban pyndap ïa ki post kiba thylli kumba ngi la leh ha kiwei pat ki tnat treikam kum ka Tnat Pule Puthi, ka Koit ka Khiah bad kumjuh ruh ha ka tnat Pulit. Ha ka Home Guards and Civil Defense ruh, ka tant ka la kyrpad ban wanrah ïa ka jingpynbeit thymmai ïa ka kyrdan pule ka ban ïaryngkat bad ka tnat Pulit bad ka jingdonkam ha ka tnat Home Guards and Civil Defense ka shu heh khyndiat haba nujor bad ka tnat Pulit bad namarkata ki la kyrpad bad kyntu ba dei ban pynlong kumjuh bad ka tnat Pulit bad ka Kynhun Myntri ka la ai ïa ka jingmynjur khnang ba kin dup lah ban pyntyllun shakhmat ïa ka jingpynrungkam,” u la ong.
