Plie u Myntri Rangbah ïa ki ICU ba 10 jingthiah ban don ha ki 14 tylli ki jaka sumar

Shillong, Nohprah 19:U Myntri Rangbah ka jylla u Conrad K Sangma bad ka Myntri ka tnad ka koit ka khiah ka Kong Ampareen Lyngdoh mynta ka sngi Baar, kila plie paidbah ïa ki ICU project ba 10 jingthiah ha ki 14 tylli ki jaka ai jingsumar kiba don ha ki 11 tylli ki District jong ka jylla lyngba ka video conference.
Ki ICU Project ba 10 jingthiah ka dei ka jingïatreilang hapdeng ka tnad Health and Family Welfare, jong ka sorkar jylla bad ka eGovernment Foundation bad kum ka jingpyniaid shakhmat ia ka kam la plie ïa ki 14 tylli ki ICU ba 10 jingthiah ha ki hospital kiba don ha ki 11 tylli ki district jong ka jylla.
Haba kren ha ka jingïalang u Myntri Rangbah ula ïaroh ïa baroh ki nongdon bynta kiba la shimkhia ban pyntyllun ïa kane ka projek ban pynthikna ban ai ïa ka jingsumar bad ka jingai jingshakri ha ki thaiñ nongkyndong bad ha ki jaka kiba jynjar ha ka jylla kynthup ïa ki Hospital ha ki District.
“Ki tiar ki tar bad ka rukom treikam la pynïaid ha kata ka dur ban ban ailad ïa ngi ban pyndonkam ïa ki jingdon jingem bad ban pynlong ïa ki kiba treikam pura. Ka long ka jingai mynsiem ban pynïar ïa kane ka jingshakri, khnang ba ka jingkyrshan kaba bha tam ha kaba ïadei bad ka koit ka khiah na ka bynta ki katto katne ki jaka kiba jngai bad kiba jynjar ha jylla, yn lah ban pynurlong” ong u Myntri Rangbah.
Ula ong ba ka sorkar jylla ka la buh hakhmat eh ïa ka koit ka khiah bad da kaba buh ïa kane hakhmat ka sorkar jylla ka la mang 8% ïa ka Mang tyngka ha kaba ïadei bad ka koit ka khiah, kaba long ruh kaba heh tam hapoh ka ri.
Katba ka Myntri ka Koit ka Khiah ka Kong Ampareen Lyngdoh ka la ong lyngba kane ka projek ka sorkar jylla kan lah ban pynbiang ïa jingsumar ha ki ICU ha ki District bapher bapher bad ka jingplie paidbah ïa ka 10 Bed ICU project kan ïaid shakhmat ban pynthikna ba kan don ka jingkylla ha ka ban kyntiew ïa ka jingai jingsumar ha ka jylla.
Ha kane ka jingïalang la ïadon lang u Chief Secretary ka jylla u Bah DP Wahlang, u Principal Secretary ka tnad ka koit ka khiah u Sampath Kumar, u Chairman ka Infosys u Nandan Nilekani, u Chairman ka 10 Bed ICU u Srikanth Nadhumuni, u nongseng ka Karuna Trust u Dr Sudarshan Hanumappa bad u Public Health Expert bad Scientist u Nichiket Mor.
ïa ka10 Bed ICU Project la pynwandur hadien ba ka la don ka jingsaphriang jong ka COVID-19, da ka jingthmu ban pynbiang ïa ki jaka ai jingsumar kiba kyrpang ha kylleng ki bynta jong ka jylla kynthup ïa ki jaka kiba jngai kiba don ha kyndong kynshrot.