Nongpoh, Naiwieng 03: Ban pynïajan ïaka jingtreikam ha kaba ïadei bad ki hok jong ki paidbah nongshong shnong ban ioh ïaka jingbishar kaba hok, na ka liang ka Meghalaya State Legal Service Authority Shillong ha ka jingïatreilang bad ka Meghalaya High Court bad ka District Legal Service Authority, Ri Bhoi District Nongpoh kum shi bynta jong ka Pan India Awareness & Outreach, ka la pynlong ïaka Legal Awareness Campaign lane ka jing pynsngewthuh paidbah halor ka phang kaba ïadei bad ki hok ki riti jong ki paidbah ïa kaba la pynlong ha ka Iew Mawlasnai, Ri Bhoi District, haka sngi Balang jong ka taiew.
Ha kane ka campaign, la ioh ïaka jing batai pynshai da I Kong B.Sten, Advocate kaba dei ka Legal Aid Counsel DSLA, Shillong ha kaba kala batai bñiah halor ka National Legal Service Authority bad ïaka phang treikam jong ka, ka la pynshai paidbah ruh halor jong ka POCSO Act ka aiñ ban pynshitom ïa kino kino kiba iuhroit ïa ka hok longbriew manbriew jong ki khyllung khynah kiba hapoh ka 18 snem ka karta.
Ka kong B.Sten ka la ong ruh ba ka jingshongkha khynnah ha kaba ka kynthei ka dang hapoh ka 18 snem ka long beaiñ bad lada jia ba ki bor ka aiñ ki lap, ki lah ruh wat ban shah kem bad shah pynngat ha kane ka kyndon aiñ POCSO.
Shuh shuh ka la pynshai paidbah ruh ha kaba ïadei bad ki lad jingïarap kiba lah ban ioh lyngba ka District Legal Service Authority (DSLA), ka la ong ba ka DSLA ka dei ka shnat treikam kaba la mang kyrpang ban ïarap ïaki briew kiba wan na ki longing kiba duk ba kyrduh ki bym don lad ban thung ne buh ïa u/ka nongsaid aiñ na ka bynta ki hok jong ki, kumta ka khot ka wer ïaki paidbah kiba donkam jingïarap ki lah ban leit sha ka Office treikam jong ka DSLA kaba don ha man la ki district.
Ha kaba ïadei bad ka Lok Adalat, ka la ong ba ka dei kawei naki lad ki lynti ban wanrah ïaka jingpynïasuk bad ka jingpynkut noh ïaki mukotduma bad kiwei pat kiba lah ban pynïasuk kat kum ki kyndon aiñ. Kumta lyngba kane ka campaign, la khot ïaki paidbah nong shong shnong kiba sngew donkam ba kin mih shakhmat khlem jingriej bad pyndonkam ïakine ki lad ki lynti kiba ka sorkar ka buh khnang naka bynta jong ki.
Shuh shuh ha katei ka sngi la sam ruh ïaki kot lyngkdop kiba la pynmih da ka Meghalaya State Legal Service Authority Shillong ki ban batai bñiah halor ka mat treikam jong ka NALSA, MSLSA, DSLA bad ruh halor jong ki hok jong ki paidbah.
