Plie u Myntri Rangbah ïaka Rising Sun Water Fest ba 3 sngi ha Umiam Water Sports Complex

Nongpoh, Naiwieng 03: U Myntri Rangbah ka jylla u Conrad K Sangma mynta ka sngi u la leit ban plie paidbah ïaka Rising Sun Water Fest 2022 ba 3 sngi lynter bala pynlong da ka kynhun India Army bad kumjuh ka sorkar Meghalaya kaba dei shibynta jong ka Khelo India ha Umiam Water Sports Complex.
Ha katei ka tamasa ñiah lieng la wan ruh ban shim bynta da ki kynhun bapher bapher na kylleng ka Ri India bad kumjuh ki shipai Indian Army ban ïakop ñiah lieng ha pung Umiam.
Haba kren ha ka jingïalang, u Myntri Rangbah ula ai khublei ïa ki nongpynïaid ïa katei ka tamasa kaba dei kawei naki tamasa ñiah lieng ba heh bad bala pynlong haka sien na nyngkong eh haka jylla.
U la ïaroh ruh ïaka jylla Meghalaya kaba dei kawei naki jylla kaba la kyrkhu, naduh ka jingdon ki jaka puta kiba itynnad kiba lah ban khring ïaki nongjngohkai pyrthei, ka jinglong jingman jong ka mariang, bad ka pung Umiam kadei kawei naki jaka jngohkai pyrthei kaba itynnad kaba ki briew na kylleng ki jaka ki ju sngewtynnad ban ieng peit kai ïaka jinglong jingman jong ka jaka bad ka jingitynnad ka mei mariang.
Ula ong ruh ba lyngba kum kine ki jait tamasa kan pynlong bad khring ïa ki nongjngohkai pyrthei ba kin wan ban sakhi ïa ka jingitynnad jong ka mei mariang kaba lah ruh ban kyntiew ïa ka ïoh ka kot ryngkat ka jingkitbok ïaki kynhun ba ïashimbynta ha katei ka tamasa ba kin khur ïaka nam jop.