Pynsngewthuh ka DLSA ïa ki khynnah skul halor ka Cyber Crime, ki aiñ ïada ïa ki khynnah rit

Mawkyrwat, Jymmang 02: Ka ophis jong ka District Legal Services Authority (DLSA), South West Khasi Hills District ha ryngkat ka jingïatreilang lang ka ophis u Superintendent of Police, South West Khasi Hills District bad ka ophis u District Child Protection Officer, South West Khasi Hills District ka la pynlong ïa ka jingai jinghikai halor ki mat ba donkam ba kum ki khynnah skul ki dei ban tip, ban leh bad bym dei ban leh.
Ka jingthmu ba kongsan jong kane ka prokram ka long ban ai jinghikai ïa ki khynnah skul ba kin tip halor ki aiñ kiba ïa dei bad ka jingim jong ki briew lada ki don ka jingïatyngkhuh bad ki lad jingïada lada don ki khyllung khynnah kiba shah leh beiñ ha kaba ha kane ka sngi yn pynshai ha ki halor ka Juvenile Justice (Care and Protection of Children) Act, 2015, ka Cyber Crime bad ka NALSA (Child Friendly Legal Services to Children and Their Protection) Scheme 2015.
Ïa kane ka prokram la pynlong hapoh jong ka Modern Academy Higher Secondary School, Rangmaw ha kaba u bah T. Kyndiah, District Child Protection Officer, South West Khasi Hills District, u bah D. Mawleiñ, MPS, Deputy Superintendent of Police, South West Khasi Hills District bad ka kong Nosmi Hahshah, Panel Lawyer jong ka District Legal Services Authority (DSLA), South West Khasi Hills District ki la long ki resources person.
Namarkata, ka long kaba donkam ban ai jingpynshai halor kitei ki bynta namar ki khynnah kiba hapoh ka 18 snem ki donkam ka jingïada bad jingsumar na ka liang jong ka aiñ ne ka Child Need of Care and Protection, ki khynnah kiba ïa tyngkhuh bad ka aiñ namar lada ju don ba ong ba lada ki khynnah kiba dang rit ki leh ki kam dakait ym lei lei hynrei ha ka aiñ hi kan nym don kaba kum kata ka jingshah liang.
U bah T. Kyndiah, District Child Protection Officer, South West Khasi Hills District u la kren halor ar tylli ki bynta ka ki khynnah kiba donkam ki jingïada bad ki khynnah kiba ïa takhuh bad ka aiñ (Child need of Care and Child Conflict with Law) bad kumjuh ruh ïa ka Juvenile Justice Act, katba u bah D. Mawleiñ, MPS, Deputy Superintendent of Police, South West Khasi Hills District u la kren halor ka Cyber Crime nangta, ka kong Nosmi Hahshah, Panel Lawyer jong ka DSLA, South West Khasi Hills District ka la kren halor ka kumno ki khynnah ki lah ban ïoh jingïarap na ka aiñ khlem da donkam kano kano ka jingsiew ne ka NALSA (Child Friendly Legal Services to Children and Their Protection) Scheme 2015.
Ïa ka jingïalang ha kane ka sngi la pynïaid da ka kong D. Sohtun, Chief Judicial Magistrate, District Legal Services Authority (DLSA), South West Khasi Hills District katba ka jingkren pdiang sngewbha la ïoh na u bah I. Marweiñ, Incharge Principal jong ka Modern Academy Higher Secon-dary School, Rangmaw bad ïa ka jingkren khublei la ïoh na ka kong S. Nongsiej, Assistant Teacher jong ka Modern Academy Higher Secondary School, Rangmaw.