Nongpoh, Jymmang 02: Kum kawei na ka thong ban pynshlur ïa ki nongrep ka jylla ban rep ïa ki mar rep kiba khlem da pyndonkam dawai (Organic crops) bad kumjuh ruh ban wan rah ïa ka iew ka hat ki mar rep, ki nongrep na ka jylla Meghalaya ki la leit ban shim bynta ha kawei na ka rynsan ïa pyninam ïa ki mar rep ha Manipur ba la tip kum ka Agro Horticulture Expo kaba la sdang naduh ka 27 tarik u Ïaiong bad ba la pynkut noh ha ka 30 tarik u Ïaiong ha ka jylla Manipur.
Ïa kane ka rynsan ïa pyni nam ïa ki mar rep na kylleng ki jylla jong ka thaiñ Shatei Lam Mihngi ka ri India la wan ban plie paidbah da u Myntri Rangbah ka jylla Manipur, u N Biren Singh ha ryngkat ka jingdon ki heh ophisar na ka tnad rep na kylleng ki jylla kiba la wan ban shim bynta ha kane ka jingïapyni nam ïa ki mar rep.
Na ka jylla Meghalaya ruh la don ki kynhun nongrep ba la leit shim bynta ba kynthup ïa ka Eastern Ri Bhoi Company bad ka Jirang Organic Producer Company bad ki don ruh na kiwei kiwei ki District kum na Garo Hills.
Kumba la pynpaw, ka jingthmu jong kane ka Agro Horticulture Expo lyngba ka sorkar India ka long ban pynneh pynsah ïa ka rukom rep kaba khlem da pyndonkam dawai ba ki khot kata ka Mission Organic Value Chain Development ha North East Region khnang ba ki mar rep kiba pynmih da ki nongrep lah ban pynïaid iew ha kylleng ki ri ka pyrthei.
Na ka jylla Meghalaya la leit ai mynsiem ruh ïa ki nongrep da ka jingdon lang ka Kong Kong Isawanda Laloo, Member Secretary ka sorkar Meghalaya, ka Kong Barisha Mukhim bad kiwei kiwei de.
