Mairang, Jymmang, 2: Kum shibynta ban ïada ïa ki doh um doh wah bad na ka bynta ka jingshngaiñ jong ki paidbah nongshong shnong, u District Magistrate ka Eastern West Khasi Hills District ha ka hukum ba la pynmih hapoh ka section ba 144 jong ka CrPC, u la pakhang ïa ka jingber ïa kino kino ki jait dawai ha shilynter ka Wahkhri kaba don ha Eastern West Khasi Hills District.
Katkum ka hukum u District Magistrate, ka jingber ïa ki dawai ha ki wah ka pynjaboh bad pynlong bih ïa ki bad ka wanrah kylla ïa ka jingïap jong ki dohum dohwah, kaba ktah pat ïa ka koit ka khiah bad ka ïap ka im jong ki paidbah nongshong shnong.
Kino kino kiba pynkheiñ ïa kane ka hukum kin shah pynshitom katkum ka section ba 188 jong ka Indian Penal Code, 1860 bynrap shuh shuh ka hukum u District Magistrate.
