Nongstoiñ, Jymmang, 2: U nongïakhun kti (Arms Wrestling) ba pawnam ka jylla Meghalaya u ba dei trai shnong ruh na ka thaiñ Nongstoiñ, mynta ka sngi u la ïoh ban khur ïa ka takma Ksiar ha ka jingïakhun kti ïa kaba la pynlong ha Ri Arab.
Katei ka lympung kaba la tip kum ka 20th Asian Para Arms Wrestling Championship la pynlong ha nongbah Dubai Azman UAE, kaba la sdang naduh ka 28 tarik u Ïaïong 2023 bad ka ban kut ha ka 3 tarik u Jymmang mynta u bnai.
La ong ba ha katei ka lympung haba ïakhun da ka kti kadiang, utei u samla rangbah u la ïoh ban khur tang ïa ka kyrdan kaba ar. Katba ha ka jingïakhun da ka kti kamon pat u la ïoh ban khur syndon ïa ka takma Ksiar ha ka jingkhia kaba 70 kg, da kaba u la lah ban pynliem ïa u Dmitri Skubaba u ba napoh ka Ri Kazakhstan.
La ong shuh shuh ba mynnin haba ïakhun ha ka kti kadiang u dei utei u juh hi u ba la shah pynliem noh mynta ka sngi bad u Hubert u la ïoh shi syndon ïa ka kyrdan nam lahduh.
Kumban shu pynpaw hangne ba utei u samla u dei ruh u bym lah ban ïoh sngew bad ha kajuh ka por um nang ban kren. U dei u khun jong u bah Skenar John Kharbani bad I kong Blessila Paliar, kiba na ka shnong Mawrok Mawliehbah kawei na ki shnong nyngkyndong ha ka thaiñ Nongstoiñ West Khasi Hills District.
U dei ruh u ba wan na ka longïing kiba duna ha ka ïoh ka kot, ha kaba ki kmie ki kpa jong u ki dei tang ki nongbylla mynsngi bad bam mynmiet, kiba shisur shidur bad kiba duna jingstad.
