Palat ar taïew tyrkhong umdih ki shnong ba shah ktah na ka jingksam marpoh khyndew, ujor biang ki nongsynshar shnong ha u DC WKH
Nongstoiñ, Jymmang 2: Ka jingleit ksam marpoh khyndew jong kawei ka Kompeni ha Mawlangria, ka jaka kaba don hajan ka shnong Mawïawtep kumba ar kilomitar na ka surok Rambrai Mawdoh, ka la pynlong ïa ki paitbah jong ka shnong Mawmluh bad ka shnong Urkhli, ban pyrshah hi bad ba kin ym shah satia ban katei ka Kompeni ksam marpoh khyndew kan trei, namar ka um bam umdih kam long shuh.
Kumta mynta ka sngi ki sordar jong kitei ki shnong ryngkat ka jingkyrshan lang jong ki paitbah na kiwei pat ki shnong, ki la leit ban buh da ka jingujor ha u Deputy Commissioner jongka West Khasi Hills ba u dei ban leh ei ei kham kloi ban khanglad ne ban pynsangeh ïa katei ka Kompeni.
U bah B.Kharmawphlang sordar shnong Urkhli bad u bah D.Lyngkhoi sordar shnong Mawmluh II ryngkat ki nongïalam jong kiwei pat ki shnong, haba ïakren bad u nongthoh khubor hadien ba ki la mih na kamra treikam jong u DC, ki la ong ba la palat ar taïew ki paitbah jong kitei ki shnong ki la dih da ka um jngut, namar ha ka por ba slap ka khyndew kaba mih na ka jingksam marpoh khyndew na katei ka jaka ka tuid ha ka tyllong um ba ki ring umbam um dih.
Da kaba sngewkhia, kitei ki sordar shong ki la ong ba ha kitei ki ar tylli ki shnong ki la don palat phra phew tnum ïing bad ki nongshong shnong ki la kot sha ka saw spah tam ngut. Kumta kim kwah ba ki bor sorkar kin shah ba katei ka jingksam marpoh khyndew kan dang bteng bad kim kwah ruh ba ki bor District kin pynkylla sñiang ïa ki sawspah tam ngut ki nongshong shnong da kaba pyndih da ka um kaba jngut.
Kitei ki sordar shnong ki la ong ruh ba ha ka 12 tarik jong u bnai ba la dep, u Deputy Commissioner u la phah ïa u bah D.Marweiñ MCS, ban leit sha katei ka jaka ban jurip ïa katei ka jingksam marpoh khyndew ha katei ka jaka na katei ka jaka, ban phah sangeh namar ka ktah ïa ki tyllong um ba ki paitbah shnong ki pyndonkam. Hynrei tang hadien katto katne sngi ka jingtrei ka la sdang biang bad ka la bteng haduh mynta.
Kumta ki nongsynshar shnong ryngkat ki paitbah ki dawa ba ki bor District, ki dei ban pynsangeh noh kloi namar lada ka jingtrei kan dang bteng bad lada ki paitbah kin duh ïa ka um bam umdih kaba khuid, kim banse ban ïaid da kiwei pat ki lynti.