Nongstoiñ, Jymmang 2: Ka seng Hynñiewtrep Achik Youth Front hapoh ka jingïalam jong u bah Banraplang Kharpor President HAYF seng kmie, mynta ka sngi ka la leit ban jurip ïa ka Karkhana saiñ nar kaba la tip kum ka M/S Shree Shakambari Ferro Alloys Pvt Ltd kaba don ha Rwiang, Nongstoiñ West Khasi Hills District.
Ka seng ka la ong ba ka dei hadien ba ki katto katne ngut ki nongshong shnong jong katei ka shnong ki la ujor sha ka seng, ba ka don ka jingpyntreikam ïa ki khynnah kiba dang hapoh ka 18 snem ka karta. Kumta ka seng hadien ba ka la jurip ka la kynnoh bad ong ba ka la lap shisha ïa ka jingdon jong ki khynnah kiba dang rit ka karta ba la pyntrei ha katei ka karkhana.
La ong shuh shuh ba don ruh ki bar jylla ki bym la don ïa ki kot ki sla kiba biang. Nangta ïa ki khynnah khasi kiba trei ha katei ka karkhana, la leh shilliang da ki bor pynïaid jong katei ka Karkhana da kaba kim shym la pynbiang ïa ki juti, ki jingda khmut, ki jingdeng kti bad kiwei kiwei hynrei la shu phah trei khlem kitei ki tiar ïada.
La ong shuh shuh ba ïa u Fly Ash ne u pui pui u ba mih na katei ka Karkhana, ym shym la tep katkum ka rukom. Hynrei la shu buh patar ha kaba ka lah ban wanrah jingma ïa ki doh um doh wah bad ïa u khun bynriew ruh kumjuh. Kumta ka seng ka la byrngem ba kan ïaid sha ki bor kiba halor ban ujor ïa ki jingduna jong katei ka Karkhana.
Katba na ka liang jong u manager jong katei ka Karkhana u la ong ha ka jinglong briew, don beit ka jingdkoh haba trei ïa ka kam. Hynrei na ka liang jong u, um ju shah ïa kiba dang rit ka karta ba kin trei ha ka Karkhana kaba u khmih.
