Shillong, Jymmang, 09: Ka Myntri ka Koit ka Khiah ka Sorkar Jylla ka Dr.Ampareen Lyngdoh ha ka sngi Baar ka la pynshlur ïa ki paidbah nongshong shnong jong ka jylla ban pynrung kyrteng Aadhaar.
Ha ka jingïakren bad ki lad pathai khubor, ka Dr. Ampareeen ka la ong, ka long kaba donbok watla ïa ka jylla Meghalaya la pyllait ïa ki paidbah na ka bynta ban pynrung kyrteng Aadhaar, hynrei ki don katto katne ki skhim jong ka Sorkar India kiba donkam ban pynïasnoh bad u Aadhaar kumba long ha kaba jingsam marbam reshon ha kaba ki nongïoh bhah ki hap ban pynisoh bad u Aadhaar.
Ha kaba ïadei bad ka Megha Health Insurance Scheme, ka la ong, ka MHIS jong ka jylla Meghalaya mynta la pynïasnoh lang bad ka skhim bakyrpang jong u Myntri Rangbah khnang ban ki paidbah kin ïoh ïa ki jingmyntoi bad namakata ka long kaba donkam ban pynrung kyrteng Aadhaar ban ïoh ïa ki jingmyntoi.
Ka Myntri ka la ong ba ki nongshong shnong jong ka Jylla Meghalaya mynta kim da don shuh kano kano ka jingsngew shaphang ka jingpynrung kyrteng Aadhaar namarba ha ki snem kiba ladep, ki paidbah mynta ki la sngewthuh ïa ka jingshisha shaphang u Aadhaar bad kam don shuh kano kano ka jingshah pynsngewthuh bakla.
Haba pynpaw ba u Aadhaar u dei uba pynïasoh lut ïa baroh ki jingdonkam, ka Dr. Ampareen ka la ong, “ha ka elekshon 2023 kaba la long dang shen ha Meghalaya, bun na ki BLO ki la pynsngewthuh ïa ki paidbah ban pynïasoh ïa u Aadhaar bad ki EPIC bad kam da long eh kaba kongsan hynrei haba shu peit ha ki snem ki ban sa wan manla ki kot ki sla bad manla ki nongshong shnong jong ka jylla Meghalaya bad kumjuh ruh ha ki jylla ka ri India kin hap ban pynïasoh bad u Aadhaar. Namarkata bun tylli ki skhim wat ïa ki longkmie ba la armet mynta ki la ïoh jingmyntoi ha kyllleng ka jylla Meghalaya hadien ba ki la don ïa u nombar Aadhaar.
