Shillong, Jymmang, 09: Ka Jaiñtia Co-ordination Committee for Reservation Policy (JCCRP) kaba long ka shatri jong ki sengbhalang na rilum Jaiñtia kiba kynthup ïa ka Jaiñtia Students’ Union (JSU), ka Jaiñtia Students’ Movement (JSM), ka Jaiñtia Youth Federation(JYF), ka East Jaiñtia National Council (EJNC) lem bad ki nongsynshar shnong kiba kynthup ïa ka Synjuk Waheh Chnong Ri Jaiñtia bad ka Synjuk Waheh Chnong Jowai ha ka 9 tarik u Jymmang, 2023 ki la aiti da ka dorkhas ha u Symbud Myntri Rangbah ka Jylla u Bah Sniawbhalang Dhar da ka jingkyrpad ïa ka Sorkar MDA-2.0 ba kan bishar bad ban pynthymmai noh ïa ka State Reservation Policy-1972.
Ha ka dorkhas ba la aiti ha u Symbud Myntri Rangbah ïa kaba la soi da ki nongïalam jong ki lai tylli ki sengbhalang bad ki ar tylli ki synjuk jong ki khlieh nongsynshar shnong, ka JCCRP ka la pyntip ba ha ka jingïalang kaba la long ha ka 12 tarik, Ïaiong, 2023 ka la shim ïa ka rai ban pynsngew sha ki tyndong skhor jong ka Sorkar Jylla ba kam dei ban pyntreikam ïa ka Roster System katkum u snem ba la mynjur ban pyntreikam ïa ka Reservation Policy.
“Ngi kwah ïa ka Sorkar Jylla ba kan bishar bad ban pynthymmai ïa ka State Reservation Policy 1972 kaba la rim namarba katkum ka jingkiew jong ki nongshong shnong bad ki samla pule kiba la nang la stad ha kane ka jylla ka Reservation Policy ka paw kum ka jingle shiliang khmat pyrshah ïa ki katto katne ki jaidbynriew watla ha ka jingshisha ki paralok Garo jong ngi ki ïoh ïa ka bhah kaba 40% ha ka State Reservation Policy katba ma ngi ki Khasi bad ki Jaiñtia ngi hap ban ïaknieh paramangi tang na ka bynta ka 40%,” la ong ka JCCRP ha ka dorkhas.
Ka JCCRP ka la pynpaw ruh ba ka por ka ladei ïa ka Sorkar ba kan pynthymmai noh ïa ka Reservation Policy kaba la rim shaba palat khnang ba kan long kaba ïaryngkat marbiang na ka bynta ki lai tylli ki jaidbynriew.
