Da ka Selection Committee thaw ka Sorkar ban jied ïa ki ban leit mihkhmat sha ki tamasa Phlim
Shillong, Jymmang 09 : Ka Sorkar Jylla ka la rai ban thaw noh da ka Selection Committee ka ban khlieh da u Chief Secretary, ka ban jied ïa ki briew ki ban leit ïashimbynta ha ka International lane National Film festival, ka ban pynshong nongrim kat kum ka jingpaw ki kam ba ki trei.
ïa kane ka rai la shim ha ka jingïalang ba la pynlong da ka Myntri ka Tnad Information & Public Relation Kong Ampareen Lyngdoh mynta ka sngi la iadon lang ruh ki Tnad ba don bynta jong ka Arts & Culture, Information & Public Relation bad ka Tnad Tourism.
Ka Myntri ka la lum ruh ïa ka jingtip halor ka jinglong jingman kaba mih na ka jingjied ïa u Bah Commander Shangpliang bad Nicholas Lemtor Khangkongor ban leit ïashim bynta ha ka Cannes Film Festival.
“La ai jingmut ba hadien ka jingbishar ïa ka kyrteng u Bah Pradip Kurbah bad Dominic Sangma ba u Dominic Sangma u lah ban shah jied bad ïa ka kyrteng jong u ban phah sha ka Ministry of Information & Broadcasting ba un ïashim bynta ha Cannes Film Festival bad ki don ruh ki khubor ba u Nicholas Lemtor Kharkongor u lah ban weng noh ïa ka jingleit ïashim bynta ha kane ka tamasa” pyntip u Pravin Bakshi Commissioner & Secretary ba khmih ïa ka tnad IPR lyngba ka kyrwoh.
Ula pyntip ruh “La rai ha ka jingïalang ba ïa kum kine ki kabu bad ki International lane National Film festival ba hadien habud, kan sa don noh da ka Selection Committee ka ban khlieh da u Chief Secretary ka Sorkar Jylla, ka ban jied ïa ki briew ki ban leit ïashim bynta hadien ka jingïasyllok bad baroh lai tylli ki Tnad kum ki dkhot ka Committee bad ruh da ka jingïamynjur bad ïarai lang”.
Ka kyrwoh kala ong ruh ba la ïai ban ba watla ki Tnad ka Sorkar Jylla kin phah ïa la ka jong ka jingtyrwa na ka bynta ka jingjied ïa ki nongshna phlim ka Jylla sha ki tamasa, hynrei ka jingjied hi ka shong ha ka Information and Broadcasting Ministry ka Sorkar India bad ka long laitluid ïa ka ban leh ïa kane kum ka Ministry.
“Hynrrei, ka Tnad IPR ka la ïakren ïa kane ka kam ban bujli noh ïa ki briew bad ka Information & Broadcasting Ministry, ka Sorkar India ka ban shong kat kum ki kyndon bad rukom treikam jong ka” ula bynrap.