Kwah u Chairman MIDC ban thaw da ka Forum ban pynkhlaiñ ïa ki kam karkhana ha jylla

0

Shillong, Jymmang 09 : U Chairman ka Meghalaya Industries Development Corporation (MIDC) u James PK Sangma hynne ka sngi Ba-ar, ula ïathuh ba un sa khot ïa baroh ki karkhana ha Meghalaya ban thaw ïa ka Joint Consultative Industries Forum (JICF) hapoh ka Jylla ban nang kyrshan ïa ka jingpyrshang jong ka Sorkar Jylla ha ka ban pynkhlaiñ ïa ki kam ba ïadei bad ka kam karkhana hapoh ka Jylla.
U James ula ong ba ka JICF kan ïarap ban ithuh ïa ki kam ba hap pynleit jingmut bad kiba hap buh hakhmat na ka bynta ka jingkyntiew ïa ka ïoh ka kot bad ki kam karkhana da kaba pynïadon bynta lang ïa baroh ki kynhun, nalor ban leh eiei halor ki kam ki ban ïarap ïa ka Meghalaya ba kan kynjoh sha ka thong ban lah kyntiew ïa ka ïoh ka kot.
“Ha ka jingïalang jong nga ba dang shen bad ki kynhun ki karkhana kum ka Confederation of Indian Industries (CII) bad ka Federation of Indian Chamber of Commerce and Industries (FICCI) ha New Delhi, ngi la ïakren ïa ka lad ban kyntiew ïa ka kam seng karkhana hapoh Meghalaya bad kumno ba kan ïarap ha kaban pynurlong ïa ka thong ban pynlong ïa ka Meghalaya ka Jylla ba kot T. 10 billion ha ka ïoh ka kot hapoh u 2028” ong u James.
“Kum ka sienjam ba nyngkong, ka long kaba kongsan ba ngin don shuwa ïa ka forum jong baroh ki karkhana bad ka Sorkar khnang ba ngin lah ithuh ïa ka lynti ïaid nangne shakhmat da ka jingïatreilang. Ha ka jingïaid lynti jong ngi ban kyntiew ïa ka ïoh ka kot ka Jylla, baroh ngi donkam ban ïadonlang ha kajuh ka nongrim bad kane ka dei ka sienjam sha kane ka bynta” ula bynrap.
U James ula ban jur ba ka forum kan shim ïa ka bynta kaba khraw bha ha ka ban wanrah ïa ka jingseng kam bad jingkynshew kam sha ka Jylla, ka ban ïarap kyntiew ia ka Gross State Domestic Product (GSDP) nalor kan nang pynbun ïa ki lad ki lynti ban kyntiew ïa ka kam khaïi bad ka ïohkam ïohjam.
Ha ka 4 tarik u Jymmang, u James ula thoh sha u Myntri Rangbah ka Jylla Conrad K Sangma halor kane ka kam, bad kyrpad ïa u ba un khlieh ïa ka Forum bad ka MIDC kum ka nodal agency.

Leave A Reply

Your email address will not be published.