Sniew ka resol klas 12 Science ki skul sorkar, khlem pas iwei ruh na Dalu tang iwei na Williamnagar

Shillong, Jymmang 09: Ka Meghalaya Board of School and Education (MBOSE) ha ka sngi Ba-ar ka la pynbna ïa ka resol jong ki khynah kiba ïakhun ïa ka eksamin klas 12 ha ka Science bad Commerce bad la sakhi ba ki skul ba la pynïaid hi da ka sorkar ki la long ba nyngkong na ka jinglah ban leh sniew ha ka jingpas bha ki khynnah.
Lada ïa phai sha ka jingpass bha la ïohi ba ki samla pule na ki skul shimet ne balang bad kynhun niam ki la lah ban wan sha khmat ha ka jingpas bha.
Na ki 3635 ngut kiba ïakhun kiba pas ki poi 2866 ngut kaba mut 78.84% kiba pas bad kaba kham tam ban ïa ka jingpas lada nujor bad u snem uba la lah.
Lada phai sha ki skul sorkar kiba leh sniew tam ïa ka ka kyrdan ba nyngkong la bat da ka Dalu Government Higher Secondary School ha kaba na ki 4 ngut kiba ïakhun ym don satia iwei ruh iba pass bad ïa ka kyrdan kaba ar ha ka jinglah ban leh sniew la bat sa ka Williamnagar Government Higher Secondary School ha kaba na ki 8 ngut kiba ïakhun tang iwei iba pass kata kba kynjoh 12.50%.
Lada peit na ka jinglah ban leh bha napdeng ki skul sorkar ha ka jylla la ïoh bat da ka Government Boys’ Higher Secondary School, Jowai bad ka ka Government Girls Higher Secondary School Tura ha kaba kiba ïakhun baroh ki pass lut (100%) bad bud sa ka Government Boys’ Higher Secondary School Shillong ha kaba na ki 29 kiba ïakhun 25 ngut ki pas kata 86.2%.
Napdeng ki District, kaba lah ban leh bha tam ka dei ka South West Garo Hills ha kaba 90% ki pas na ki 20 ngut kiba ïakhun 18 ki pas bad bud pat sa ka West Khasi Hill ha kaba kiba pas ki ki poi 85.04% na ki 127 kiba ïakhun 108 ngut ki pas katba lada phai sha ki District kiba duna tam kiba pas na kiba ïakhun ka dei na East Jaiñtia ha kaba kiba pas ki don 51.16% ha kaba na ki 43 ngut kiba ïakhun kiba pas ki don 22 ngut.
Ha kawei pat ka liang lada phai sha ka Commerce na ki 2383 ngut kiba ïakhun kiba pas ki don 1890 kata 79.31% kaba kham hair da bunshah lada nujor bad u snem uba la dep.
Ïa ka kyrdan kaba ha khmat eh na ka jingduna kiba pas la bat da ka Tura United Christian Academy kiba pas ki don tang 38.70% ha kaba 31 ngut kiba ïakhun kiba pas ki don tang 12 ngut.
Na pdeng ki district ka East Garo Hikks ka la lah ban leh bha tam, kiba pas ki don 95.71% ha kaba na ki 70 ngut kiba ïakhun kiba pas ki don 67 ngut bud pat saka East Jaiñtia ha kaba ka percentage kiba pas ka poi 93.33 ha kaba kiba ïakhun ki don 75 kiba pas ki don 70 ngut.
Lada phai sha ki jingbym lah ban leh bha pat ïa ka kyrdan kaba nyngkong la bat da ka North garo Hills ha kaba ka pas percentage ka poi 42 bad ha kaba kiba ïakhun ki don 50 ngut kiba pas ki don tang 21 bad bud pat sa ka South West Khasi Hills ha kaba ka pas percentage ka poi 49.37 na ki 79 ngut kiba ïakhun kiba pas ki don 39 ngut.