Ngin kmen palat lada ki MLA ka UDP kin wan pynïasoh noh sha ka BJP, ong u Bah Sanbor Shullai

Shillong, Nailur 02: U Nongïalam ba rangbah ka BJP ha Meghalaya ba dei ruh u MLA ka party na Shillong South bad kumjuh kum u Myntri ha ka Sorkar Jylla, Bah Sanbor Shullai u la ong ba ka BJP ka long kaba kloi ban pdiang sngewbha ïa ki MLA ka UDP lada ki rai ban iehnoh ïa ka party jong ki bad ban pynïasoh noh sha ka BJP.
Haba ïa kren bad ki lad pathai khubor hadien ka jingmihkhubor ba don ki MLA ka UDP kiba lah ban pynïasoh bad ka BJP, na ka liang u Bah Sanbor u la ong ba un sngewkmen lada ki MLA UDP ne ki nongïalam na kiwei pat ki seng sain pyrthei ki rai ban wan rung sha ka BJP.
“Lada kine ki MLA ka UDP, ki MLA bad MDC na kiwei pat ki seng sain pyrthei ne ki ki paidbah kumjuh ki nongtrei mon sngewbha ki wan rung sha ka party, ngan dap da ka jingkmen namar ngi long kiba kloi ban pdiang sngewbha ïa baroh,” u la ong.
Ha kajuh ka por u la ong ba u la ïohi ïa kine baroh tang ha ki kot khubor ba kitei ki MLA ki kwah ban rung ka party. “Ha ka jingshisha, ngam don jingtip eiei ruh em halor kane. Nga shu ïohi ba dang shen ki leit ban ïakynduh ïa u Amit Shah bad ka pyrthei baroh kawei ruh ka tip ïa kata,” u la ong.
U la bynrap, “Na ka liang jong nga, ngam don jingtip eiei. Kim shim la wan ban kynduh ïa nga kum u MLA ka BJP bad u nongtrei ba shitrhem jong ka BJP.”
U Bah Sanbor u la ïathuh ruh ba ka jingpynkhlaiñ ïa ka BJP ka dei kawei na ki jingbthah ba kongsan na ki nongïalam jong ka party na Delhi. Kumta, u ong ba ka BJP ka dang plie ïa ka jingkhang ban pdiang ïa ki nongïalam na kiwei pat ki seng sain pyrthei, ki nongïalam sengbhalang bad ki riewshimet kiba kwah ban pynïasoh bad ka party.
Ha kajuh ka por, u Bah Shullai u la ong ba um don jingtip eiei shaphang ki khubor ba 9 ngut ki MLA ka UDP ki don jingthmu ban pynïasoh bad ka BJP. U la ong ba u la tip tang lyngba ki lad pathai khubor halor ka jingwan ïakynduh jong ki bad u Myntri Kam Pohiing ka Ri, Amit Shah.
Katkum ka jingong jong u, mynta kylleng ki jaka jong ka Jylla ki la sakhi ba ki paidbah ki la sdang ban pdiang bad ban ai jingkyrshan ïa ka BJP.
“Haba nga leit ha kylleng ki jaka, ha ki prokram, haba nga ïakren bad ki, ki lah sdang ban pdiang ïa ka BJP. Ngi la trei shitom bha bad dei na kane ka daw ba namar ba ki paidbah ki lah sdang ban pdiang ïa ka party,” u la ong.
U la pynpaw ruh ba ka jingkhlain jong ka BJP ka la nang paw wat ha ki jaka kiba mynshwa ym shym la khmih lynti ba ka seng kan ïoh jingkyrshan bha. Kum ka nuksa, u la kdew ïa Mawlai, ha kaba ka BJP ka la lah ban thaw ïa ka Mandal kaba thymmai ha ki khyndiat bnai kiba la dep.
Katkum ka jingong jong u, ka jingpynrung dkhot jong ka seng ka dang ïaid man ka sngi. U la ïathuh ba ki nongkitkam ba thymmai jong ka BJP na kylleng dang shen ki la wan ïakynduh ïa u ha Secretariat ryngkat bad u Nongaiktien ka BJP, Bah M Kharkrang ban pyntip ba ki la pynïasoh bad ki BJP Mandal.