Bthah ka sorkar Jylla ïa u AG ban ym shim kam ha ki artaïew, shen yn shim rai ka Kynhun Myntri

By Mawphor Editor On Sep 3, 2026

Shillong, Nailur 02 : Ka Sorkar Meghalaya ka la bthah ïa u Advocate General Amit Kumar ban kiar na kaba leit mih ha ïingbishar ha kine ki artaïew, katba ka dang ïakren bad ki nongsaid aiñ kiba dawa ban weng ïa u na ka kam, la ong u Myntri ka tnad Law, u Bah Lahkmen Rymbui, ha ka Sngi Balang.
Kumban shu kdew hangne, na ka liang ka Shillong Bar Association bad ka High Court Bar Association ki la pynlong jingïakhih da kaba dawa ban weng ïa u AG namar ka rukom treikam jong u.
U Myntri haba kren bad ki lad pathai khubor u la ong ba u la ïakynduh ïa baroh ar tylli ki association ha ka Sngi Ba-ar ha kaba ki la pynpaw ïa bun ki jingeh, kynthup ruh ïa kiba ïadei bad u AG, bad u la kular ban shimkhia ïa kine ki kam lyngba ka tnat Law.
Ïa kane ka mat la ïakren biang ha ka Sngi Balang ha ka jingïalang kaba la khlieh da u Symbud Myntri Rangbah ba peit ïa ka tnat Home (Police), u Bah Prestone Tynsong, kaba la ïashim bynta ruh da baroh ar tylli ki association ha ka jingkhot jingïalang kaba kyrkieh.
“Ki jingeh ki long kumjuh… ki long pyrshah ïa ka rukom treikam jong u Advocate General, ha kaba ki kwah ban weng noh ïa u,” la ong u Myntri.
U la ong ba ka jingthung ïa u AG ka dei ka kam kaba la pynbeit da ka Riti Synshar, kumta ka dei ban rai da ka Kynhun Myntri, hynrei kum ka sienjam shipor, ka sorkar ka kyrpad ïa u AG ban ym mih ha ïingbishar.
“Ngin kyrpad ïa u AG ba ha kine ki artaïew un ym mih ha kino kno ki kam mukotduma bad ha ka shi taiew ngin sa ïakynduh biang ban ïakren halor kine ki mat baroh,” u la ong.
U la kyntu ïa ka Bar Association ban ïatreilang bad ka sorkar bad ban weng noh shipor ïa ka jingïakhih katba dang ïaid ka jingïakren, da kaba ong ba ka sorkar ka donkam por ban bishar bniah ïa kine ki mat.
“Ka Bar Association ka la ong ba kin rah ïa kano kano ka jingkyrpad na ka sorkar sha ki dkhot,” u la ong, da kaba bynrap ba u kyrmen ba kin weng noh ïa ka jingïakhih.
U Bah Rymbui u la ong ba ka jingïakren ka dei ka lynti ban ïaid shakhmat.
“Ïa kane ka mat lah ban pynbeit tang lyngba ka jingïakren hapdeng ki liang baroh, ym lyngba ka jingïapher ne ka jingïakhun,” u la ong, da kaba bynrap ba kiwei pat ki mat kiba ïadei bad ka rukom trei kin sa sa peit biang bad yn shim ïa ki sienjam pynbeit kiba donkam.