Ba khlem khot ïa kren u Conrad kumba u la kular ïa khih ki 321 ngut ki nonghikai ka MVETU

By Mawphor Editor On Sep 3, 2026

Shillong, Nailur 2: Namar ka jingkular u Myntri Rangbah kam shym la urlong, ki 321 ngut ki dkhot jong ka Meghalaya Vocational Education Trainers’ Union kila pynlong ïa ka jingiakhih kaba jaijai hynne ka sngi Balang ban dawa ban pynkiew noh ïa ka jingsiew kaban ïa ryngkat hapoh jong ka ‘Equal Work Equal Pay”.
Kine ki Trainers, kiba khmih ïa ka klas IX haduh XII ha kylleng ki Secondary bad Higher Secondary School, kila ong ba kila ïai tynruh ïa katei ka jingdawa lah bun snem hynrei kim shim la ioh ïa kano kano ka jubab na ka sorkar.
U President u Bah Aiban Suchiang ula ong, ba ki Trainers kila dep kynduh ïa u Myntri Rangbah ka Jylla Conrad K Sangma ha u bnai Jymmang ha Madan Students, Jaiaw ha ka por ba ula sangeh ïa ka kali bad ula ïakren bad ai ka jingpynthikna ba un sa khot ïakren ïa ki.
“Ka jingdawa ka jong ngi ka long kaba shai bha, ka jingpynkiew bad ban ai ïa ka jingsiew kaba thymmai kaban pynthikna ba ka jingtrei kumjuh ïa ka kam bad ka jingioh kaba mar kumjuh.Kane ka lah sahteng lah slem bha” ong u Bah Suchiang.
Katkum ka jingpynpaw ka Union, ki Trainers kiba khmih ïa ki Secondary Classes (IX-X) kiba la tam 3 snem ha ka jingai jingshakri ki iohpdiang T.24,000, katba kito kiba khmih lang ïa ka Secondary bad Higher Secondary (IX-XII) palat ïa ka 3 snem ki ioh T.30,000.
“Katei ka jingsiew kam long kaba iahap bad ka kam kaba ki trei.Ngi hikai naduh na ka kyrdan Secondary haduh Higher Secondary bad ki sobjek ki jong ngi kidei kiba bun bha kiba leh da ki ‘Practical’, ha kaba 30 Marks la ai ha ka Theory, 50 ha ka Practical bad 20 kum ka Internal” ong u Bah Suchiang.
Ka jingai jinghikai ka jong ki ha ka Vocational Trades ka kynthup ia ka Information Technology, Electronics, Tourism & Hospitality, Beauty & Wellness, Healthcare bad kiwei kiwei.
U Bah Suchiang ula ong, ba ka Union kala pynlong khnang ïa ka jingiakhih kaba rit ha ka sngi Balang hynrei ula maham pat ba ka lah ban nang jur lada ka sorkar ka ïai bteng ban leh bym patiaw ia ka jingdawa ka jong ki.