Shillong, Ïaïong 01: U Myntri ka tnat Excise u Bah Kyrmen Shylla ha ka sngi baar u la pyntip ba ka tnat ka dang pynsangeh shwa shipor ïa ka jingai laisen na ka bynta ka jingplie ïa ki wine shop kiba thymmai bad ki bonded warehouse na ka daw jong ka jingpynthymmai ïa ki rukom treikam ha kaba ïadei bad ka jingai laisen.
Haba kren sha ki lad pathai khubor u Bah Shylla u la ong, “Ngi la pynsangeh shuwa shipor ïa ka jingai laisen bad ngin dang wanrah ïa ki rukom treikam kiba thymmai bad ngin sdang ban ai ïa ki laisen kaba thymmai tang hadien ba la pynlong ïa ka jingwad bniah kaba paka.”
“Ki officer jong ngi mynta ki dang don ha ka kam. Ngi dang pynlong ïa ka jingpule kaba bniah ban tip haei ban kyntiew ïa ka jingdon ki wine shop bad hangno ngi donkam ban pynsangeh,” u la bynrap.
Katkum ka jingong jong u, ïa kane ka rai la shim hadien ka jingïoh pdiang ïa ki jingujor na ki trai jong ki dukan wine kiba mynta ba ki la pynpaw ïa ka jinghiar ka jingdie na ka daw ka jingdon bun ki wine shop.
“Dei halor ka jingujor, ngi pynsangeh ïa ka jingai ïa ki laisen ba thymmai. Ngin wad bniah shwa bad hadien ngin sa ïaid shakhmat bad ka jingai ïa ki laisen ba thymmai. Lada ngi ïohi ïa ki wine shop ki duna ha ki katto katne ki jaka hynrei ka jingdie pat ka kiew, ngi kwah ban ai ïa ki license hynrei ngim lah ban ai beit ïa ki tat haduh ba ki la biang ki kot ki sla kiba donkam,” u la bynrap.
Halor ka jingdon ki wine store hajan ki jaka pule bad ki jaka mane, u Myntri u la pyntip ba ka tnat kan sa peit ïa kane ka bynta hynrei kam shym la don pat ka jingai laisen ba thymmai.
U la pyntip ruh ba ka jingai ïa ki laisen ka long halor ka nongrim ka jingai NOC da ki rangbah shnong.
“Ngi burom ïa ka jingsngew jong ki paidbah bad ki nongïalam shnong kiba tip bha halor ki shnong ki thaw jong ki. Kumta ngi sngew ba donkam ban shim ka jingmynjur jong ki khnang ba hadien habud lada don ki jingjia kiba pyrshah ïa ki paidbah ngin sa lah ban ïasyllok bad ki rangbah shnong.”
U la pyntip ruh ba ka jingleit jngoh sha ki jaka ka long hi manla ka por da ki officer ha ki district.
