Nongpoh, Naiwieng 26 : Ka All Meghalaya Karbi Association (AMKA) kum kawei na ka kynhun kaba peit bad shakri na ka bynta ki Jaid Bynriew Karbi ha Meghalaya ka la mih shakhmat ban pynrem jur halor ka jingjia ha Mukroh, Block I, West Jaintia Hills ba ki 5 ngut ki mynsiem ki la duh ei noh ïa la ka jingim, tang na ka daw ki kam riewkhlaw ki Pulit Assam.
Ka kyrwoh ba la phah da u General Secretary ka All Meghalaya Karbi Association, u Bah Bah Bistocan Timung, u la ong ba ka AMKA ka la pynrem jur ïa ki pulit Assam halor ka jingleh donbor, jingleh riewkhlaw jong ki ba ki la pynïap dusmon ïa ki briew ki ba lui lui bad kum kane ka jingjia kaba ym lah ban pdiang ha ka imlang ka sahlang ba ki mynsiem ba lui lui ki la duh ïa la ka jingim khlem pat dei por.
Na ka liang ka AMKA ka la kyrpad jur ruh ïa ka ka Sorkar Meghalaya bad Sorkar Assam ba ki dei ban bishar hok halor kane ka jingjia bad kam ym dei shuh ban jia shi jia kum kine ki kam bym man kaba ngim lah ban pdiang hapoh ka im lang sahlang bad lada ki lap ha kino kino kiba leh be ain, ki da dei ban kem ha ki to ki briew kiba leh ïa ka kam bad ki dei ban bishar bniah katkum ka ain ym da kaba pyni bor lane siat klumar.
Shuh shuh, ka AMKA ka buh ruh ka jingkyrpad ïa ka Sorkar Meghalaya ba ba ka dei ban buh lane pynkhlain ïa ka police outpost ha kitei ki shnong khappud khnan gban shngain ki paitbah nongshong shnong bad ba kan ym jia shuh ïa kum kine ki jingjia.
Na ka liang ka AMKA ka phah ruh ka khubor sngewlem sha kito ki longing kiba mad ïa katei ka jingjia ba sngewsih bad ka buh ruh ka jingduwai kyrpang ba u Blei un ai ka jingjahthaid ba bym jukut ïa kito ki mynsiem ba kordor kiba la duh ïa la ka jingim tang na ka kam riewkhlaw ki Pulit Assam bad ha kawei ka bynta ruh ki pynrem jur ïa ki Pulit Assam bad dei ban pynshitom ïa ki katkum ki kyndon jong ka aiñ, ong ka kyrwoh na ka All Meghalaya Karbi Association.
