Shillong, Naiwieng, 27: Katto katne ki trai ri trai muluk ka Jylla Meghalaya kiba aplai ïa ka post Nursing Officer ha NEIGRIHMS Hospital, Shillong ki la pynpaw ïa ka jingsngewdiaw naba ki hap ban leit thoh ïa ka written examination shabar ka jylla watla kane ka Hospital ka dei kaba don ha ka jylla Meghalaya.
Kine ki nongaplai ïa kane ka post Nursing Officer ha ka jingïakren bad u nongthoh khubor ki la pynpaw ïa ka jingsngewdiaw halor kane bad ong, “ka long kaei kaei kaba sngewsih haba ka NEIGRIHMS Hospital kaba don ha kane ka jylla Meghalaya ka phah ïa ngi ban leit thoh ïa ka written examination shabar ka jylla.”
Katkum ka jingïathuh jong kine kiba aplai ïa kane ka post Nursing Officer, ki la ong ba ki hap ban leit thoh ïa ka eksamin sha Jodhpur, Guwahati bad sha kiwei kiwei de ki jaka shabar ka jylla.
“Haba ngi dei ki nongshong shnong jong ka Jylla Meghalaya balei ym shym la ai ïa ka Centre ha Shillong. Kane ka jingleh jong ki bor pynïaid ka NEIGRIHMS ka long kaba khlem da pyrkhat namarba kan buh jingeh bha ïa ngi ban leit shabar jylla tang shi sngi ban leit thoh ïa kane ka eksamin,” ki la ong.
Ha kajuh ka por ki la kren diaw ruh ba ki bor pynïaid jong ka NEIGRIHMS ki dang pyllait ïa ki Admit Card haduh ka 25 tarik katba ka jingpynlong ïa ka eksamin kan long ha ka 2tarik, Nohprah.
Katkum ka Advertisement ba la pyllait da ka NEIGRIHMS, ki don 231 tylli ki post Nursing Officer.
