Pynrem jur ka RBYF, KSU bad FKJGP ïa ki riew thrang snam ba donkti pynïap ïa u heprit ha Umtangar

Nongpoh, Rymphang 22: Ki 3 seng ba kynthup ïaka KSU, RBYF bad FKJGP mynta ka sngi kila mih shakhmat ban pynrem jur ïaki riew thrang snam ba donkti pynïap ïa u heprit Kitborlang Marbaniang haka shnong Umtangar, ha kaba kila buh jingkylli ruh kaei ka pap ka sang ba u tei u heprit u la leh haduh ban shim ïaka jingim jong u na kane ka sla pyrthei.
Naka liang kitei ki 3 seng hapoh ka jinglam khmat u Center Doloi President ka FKJGP Western Border Area, Bah Receive Pator President ka KSU Western Border Area, Samla Rishan Nongtri President ka RBYF Patharkhmah Circle mynta ka sngi kila leit ruh ban ïakynduh bad u Officer In charge ka Patharkhmah Police Station ba kum ki bor pulit ki dei ban shimkhia ban thwet bad ban kem ïaki runar ba donkti ha katei ka kam ha kaba naka liang ki bor pulit haduh mynta kim pat shongthaid ban thwet ïaki runar bad sdang ruh ban ioh ksai ïaki runar ba donkti ha katei ka kam.
Naka liang kitei ki 3 seng kila leit ruh ban ïakynduh ïa u sordar bad ki kmie ki kpa jong utei u heprit ba shah pyniap haka shnong Umtangar bad ioh ruh ban leit sngewlem ryngkat ka jingïarap kaba rit khamtam ban tip ïaka jingjia kaba bñiah naki kmie ki kpa ha kaba kum ki 3 seng kin nym shongthaid katba ka aiñ kam pat lah ban ai ka jingbishar kaba hok naka bynta u heprit Kitborlang.
Naka liang ki nongïalam kitei ki 3 seng kila pynrem jur ïa katei ka jingjia ba ki riew thrang snam kin shim syndon ïa ka jingim jong u heprit ba dang 10 snem ka rta u ba dang shong ruh tang haka klas II, ba kum ki bor pulit ki dei ban shimkhia ïa katei ka kam ban thwet bad ban kem ïaki riew thrang snam, kiba ym don shuh ka mynsiem briew haduh ban da shim ïaka jingim jong u heprit bad ban pynioh ka jingbishar ba hok ïaka iing ka sem jong utei u heprit khnang ba kum kitei ki jingjia kim dei ban nang jia nangne shakhmat.