Shillong, Jymmang 25: Ka Hynñiewtrep Youths’ Council (HYC) ka pynrem jur ïa ka Sorkar Jylla halor ki khubor kiba pynpaw ba ka Meghalaya ka la shah kheiñ kum kawei na ki jylla kiba duna tam ka jinglah ha ka pule puthi ha ka ri. Kane kam dei tang ka kyrdan kaba sniew hynrei ka long ka jingjah burom ha ka ri baroh kawei bad ka dak kaba shai ba ka Sorkar Jylla ka la rem lut ha ka jingkitkhlieh ban ïada ïa ka lawei jong ki khynnah bad ki samla ka Jylla.
Na ka liang ka seng ka la ong ba la bun snem mynta, ka Sorkar ka ju kren shaphang ka roi ka par, ka jingkiew shaphrang, ka jingpynkupbor ïa ki samla bad ka jingthmu ban pynlong ïa ka Meghalaya kum ka jylla ba kiew ha ka pule puthi. Hynrei, sha lyndet jong kine ki kyntien bad ki jingpynbna paidbah, ka jingshisha kaba sngewsih ka long ba da ki hajar ngut ki samla pule ki shah ktah ha ka rukom hikai ïa ka pule puthi kaba duna bha, ka jingpep skul shiteng por, ka jingduna ki jingtei ba donkam bad kiwei ki jingdonkam kiba biang, bad ka jingbym don ka jingthmu kaba treikam hok ban kyntiew ïa ka pule puthi.
“Ka long kaba pynlehraiñ shisha ba watla la pynlut da ki klur tyngka ïa ka pisa u Paidbah bad ha ryngkat ruh ki jingkular na ka Sorkar bad jingpynbna kiba heh, hynrei ka Meghalaya mynta ka dang hap ha ka kyrdan kaba shatdong eh ka ban pynlong pat ba ki pateng ban wan kin hap siew ïa ka dor jong ka jingbym shimkhia bad ka jingbakla ha ka rukom treikam jong kiba bor synshar. Ka lawei jong ki khynnah bad ki samla jong ngi kam lah shuh ban long ka bynta jong ki jingïalehkai saiñ pyrthei ne ki jingpyni kiba tang shabar,” ong ka kyrwoh na ka HYC.
Shuh shuh ka la ong ba ka pule puthi kam dei ka bynta kaba lah ban pynkiew tang da ki jingkren paidbah ne ki jingpynbna. Ka donkam ïa ka jingïohi jngai, ka jingbahkhlieh bad ka jingtrei kaba neh slem. Hynrei, ka Meghalaya mynta ka sakhi ïa ka rukom treikam kaba la shah iehnoh ha ka liang ka pule puthi bad i kumba kiba don ha ka bor pat ki don sha jngai na ka jingshisha kaba ki samla pule, ki kmie ki kpa bad ki nonghikai ki mad man la ka sngi.
Namarkata, ka HYC ka dawa ïa ka jingbahkhlieh mardor na ka Sorkar Jylla bad ka kyntu ïa ka ban shim mardor ïa ki sienjam pynbeit, kynthup ïa ka jingbishar bniah pura ïa ka rukom long ka pule puthi, ka jingpynpaw paidbah ïa ki jingduna ne jingbakla ka rukom treikam bad ka jingthmu ban pynkylla ha ka por ba la buh khnang ban pynim bad pynbha biang ïa kane ka bynta kaba kongsan ha ka Jylla, pynkut ka kyrwoh ba la phah da u Bah Roy Kupar Synrem President Hynñiewtrep Youths’ Council (HYC).
