Shillong, Jymmang 25 : U Myntri ba peit ïa ka tnad Public Health Engineering (PHE) u Marcuise N Marak ha ka sngi Nyngkong u la lum ïa ka jingïalang pyrkhat kam haba ïadei ïa ka projek sam umbam ne water supply scheme ha ka jylla, nangta halor ka skim Jal Jeevan Mission bad ruh ban plie paidbah ïa ka digital portal ban pynsuk ïa ki paidbah kiba wan ban rejistar online kum ki kontraktor ha ka tnad.
Katkum ka kyrwoh la ïathuh ba ha kane ka review meeting la ïa kren halor ka jingïaid jong ki projek umbam ha ki jaka sor la ka long naduh ka New Shillong Township, Williamnagar Phase 2, Greater Shillong, ka Baghmara Water Supply Schemes bad kiwei kiwei.
Haba kren hadien ka jingïalang u Myntri u la ïathuh ba ha ka jingïalang ki la ïoh ban buddien bad ïatai sani haba ïadei bad bun tylli ki water supply scheme ba don ha ka jylla kumjuh ruh halor ka skim JJM.
Haba ïadei bad ka skim JJM u Myntri ula pynpaw ba u la sngewhun haba ïadei bad ka jingïaid ka kam.
“Ngi la ïakren ruh halor ka jingïaid ka kam ha ka JJM bad nga sngewhun halor ka jingïaid ka kam,” u la ong.
Ha kane ka jingïalang la donlang ruh naduh u Commissioner & Secretary, Joint Secretary, Chief Engineer, Additional Chief Engineer, bad ki ophisar jong ka tnad.
