Nongpoh, Jymmang 25: Ha kawei ka jingjia aksiden kawei ka samla ka la mynsaw jur hadien ba kawei ka kali Innova kaba don ïa u number AS 01 KC 2276 kala kylla lyndang hapdeng surok bah National Highway ha Lumumpih, Umsning.
Katkum ka jingtip bala ioh lum la ong ba kane ka jingjia kala jia hynnin ka janmiet sngi u Blei haka por kumba 2 baje eiei janmiet ha kaba katei ka kali Innova bala ñiah da u Nayan Mani Baruah na Assam ka dang hiar na Shillong ban leit sha Guwahati hynrei namar ka jingsuba pynher sted kawei ka taiar khmat jong ka kali kala pait bad u nongñiah um lah ban tehlakam shuh ïaka kali haduh ba kan da kylla lyndang syndon hapdeng surok.
Ha katei ka kali ki don kumba 6 ngut kiba shong bad kawei napdeng jong ki ka la mynsaw jur bad pynkit mardor sha Umsning CHC bad namar ka jingjur ka jingmynsaw la pynkynriah noh sha Bethany Hospital Nongpoh ban ioh ka jingsumar kaba kham biang.
Naka liang ki pulit ka Umsning Police Station ki dang pynlong ka jingtohkit halor katei ka jingjia.
