Ynda la dep siew ïa ka VRS sha ki Nongtrei MCCL yn sa rai ka Hima halor ka jaka ba ïeng ka karkhana

Shillong, Jymmang 25 : Ka Sorkar ka la jan dep pura ha ka jingsam Voluntary Retirement Scheme (VRS) sha ki Nongtrei ka Mawmluh Cherra Cement Limited (MCCL) bad ka la mang palat 100 klur tyngka na ka bynta kane ka skhim, ong u MLA ka NPP na Sohra Bah Gavin M Mylliem ha ka Lah Sngi U Blei
Ka jingai khublei khatduh ïa ki nongtrei la mynjur ha u bnai Lber 2025 hadien ba ki nongtrei ki la pdiang ïa ka jingtyrwa VRS ka Sorkar.
U MLA ula pyntip ba ka Sorkar ka la dep siew ia ar-lai tylli ki installment jong ka VRS sha ki nongtrei.
Watla ka Sorkar ka la buh ïa ka por ba 3 snem ban pyndep ïa ka jingsam ïa ka song VRS, u Bah Gavin ula ïathuh ba artylli ki installment lah dei ban siew tang ha kawei ka snem mang tyngka.
“Ka Sorkar ka la ai ka jingkular ha katei ka por ba kan pyndep ïa kane ka jingsam VRS sha ki nongtrei tang hapoh ka lai snem mang tyngka hynrei nga sngewnguh ïa ka Sorkar hapoh ka jingïalam u Myntri Rangbah u Conrad K Sangma namar ba tang hapoh uwei u snem mang tyngka, ki la pyndep ïa artylli ki installment napdeng ka 3 installment” ula ong.
Satang kawei ka installment kaba dang sah, kaba kot kumba 27 klur tyngka.
Halor ka jaka ba ïeng ka karkhana MCCL, u Bah Gavin ula ong ba kane ka jaka ka hap hapoh ka Hima Sohra bad ka jingaiwai ka la kut noh saw snem mynshuwa.
“Kane ka dei ka jingkylli kaba biang eh ban kylli na ki nongpynïaid ka MCCL ba kumno kin leh ïa ka karkhana hynrei haba ïadei bad ka jaka ba ka karkhana ka ïeng ka hap hapoh ka Hima Sohra” ula pynpaw.
“Hooid, lada ngam bakla ka jingaiwai ïa kane ka jaka kala kut ha u snem 2020. Kumta, ïa mynta nga tharai ka don ha ka kti ka Hima Sohra ban rai ïa kane ka jaka” ula bynrap.