Pynpaw u kyrtong BJP lada shah jied kum u MLA ban kyntiew ïa ki kam jngohkai pyrthei ha Mawhati

Nongpoh, Rymphang 15: Kum u kyrtong ka BJP na Mawhati Constituency, nalor shibun ki mat treikam kiba u kwah ban wan rah ïa ka jingkylla hapoh ka Mawhati Constituency, u Dr. Evarist Myrsing u la phaikhmat ruh sha ka kam jngohkai pyrthei ha Mawhati ba lada ki paidbah kin pynjop un sa shim khia ruh ban kyntiew ïa ki jaka jngohkai pyrthei kiba don ha Mawhati Constiteuncy.
Na ka liang u Dr. Evarist Myrsing kum u kyrtong ka BJP ha kine ki sngi ha man la ki jaka haba don ka jingïalang ïalap election ka party BJP u la pynpaw paidbah ïa shibun ki mat treikam kiba u angnud ban kyntiew ïa ka Mawhati Constituency bad haba phai pat sha ki kam jngohkai pyrthei u dei uwei na u kyrtong uba la kren ruh halor ki kam jngohkai pyrthei ba ka Mawhati Constituency ka don ïa ki jaka jngohkai pyrthei kiba la bna nam bad kiba la shu iehnoh shrah pat khlem pat da leh ei ei da ka sorkar kiba la shu kut noh tang ha ki histori jong ka Mawhati.
Ki katto katne tylli ki jaka jngohkai pyrthei kiba u Dr. Evarist Myrsing u kwah ban kyntiew kum ka jaka jngohkai pyrthei ki kynthup ïa u Mawïambei, u Lum Manik Raitong, ka Laitsyier-Umtngam Valley Viewpoint, ka Pamlaban-Pamriniai Viewpoint, ka Tyrso-Umru Amur Falcon Valley, ka Nongbah Thaïang ha Umtyrkhang bad u Lum Mawtari.