Hiar u General Observer ban leit jurip ïa ki Polling Station ka Nongpoh Constituency

0

Nongpoh, Rymphang 15: Kum ka jingpynkhreh ban ïaid beit ïaid ryntih ka jingjied ïa ki nongmihkhmat ha kane ka election jied nongmihkmat sha ka ïing Dorbar thaw aiñ ka jylla ka ban long ha ka 27 tarik u Rymphang, u General Observer ha ka 14 tarik u Rymphang 2023 u la leit ban jurip ïa ki katto katne tylli ki Polling Station ba hap ha ka 9 Nongpoh Assembly Constituency.
U General Observer na ka bynta ka 9 Nongpoh Assembly, u K Veera Raghava Rao u la leit ruh ban jurip ïa ki Polling Station da ka jingdon lang naduh u Assistant Returning Officer, Zonal Magistrate, Sector officer bad ki Booth Levell Officer.
Ki Polling Station ba la leit ban jurip da une u General Observer ki kynthup ïa ka 21- Diwon Polling Station, 2-Umrang Nongbah Polling Station bad ka 26-Bleishah Polling Station kiba hap ha ka Nongpoh Constituency.
Ha kane ka sngi, u General Observer u la leit peit leit khmih ruh ïa kata ka Assured Minimum Facilities kiba dei ban don ha Polling Station, ki jaka ban thep vote bad kumjuh ruh ïa ki jinglong jingman ki Polling Station. Ban pynbit pynbïang na ka bynta ka jingthep vote, une u General Observer u la ïa kynduh lang ruh ïa ki Zonal Magistrate ka Zone IV, Sector Officer ka Sector 10, ki BLO na ki Polling Station bapher bapher bad kynthup ki nongïalam shnong ban ïa kren ne pynbeit na ka bynta ki kam ban ïaid beit ïaid ryntih ka jingthep vote ha ka 27 tarik u Rymphang mynta u snem kaba dei ka sngi ban jied pynthymmai ki nongmihkhmat sha ka ïing Dorbar thaw ka jylla.
Shuh shuh, lyngba jong kane ka sngi, la pyntip bad pynshai ruh sha u General Observer halor ka jingdon ki nongthep vote kynthei bad shynrang ha ki Polling Station bapher bapher bad ruh halor ka jingduna jong kita ki Assured Minimum Facilities kiba dang duna ha ki Polling Station bad kumjuh ruh halor ka jingdon jong ki shnong hapoh ki Polling Station.
Khatduh eh, na ka liang u General Observer, u la pynshai ruh sha u Assistant Returning Officer, Zonal Magistrate, Sector officer bad ki Booth Levell Officer halor ki kamram ba ki hap ban pyndep na ka bynta ban ïaid beit ïaid ryntih ka election bad kumjuh ruh ba ki hap ban bud katkum ki kyndon jong ka Election Commission ka ri India kaba dei na ka bynta ka jingïaid beit ka jingjied nongmihkhmat ka ban long ha ka 27 tarik u Rymphang hapoh ka jylla.

Leave A Reply

Your email address will not be published.