Hiar u President Rangbah ka UDP ban pan jingkyrshsan ïa u Bah Polestar ha Nongstoiñ

0

Nongstoiñ, Rymphang, 15: U bah Metbah Lyngdoh President rangbah ka UDP u ba dei ruh u Lamphang barim jong ka Ïing dorbar thaw aiñ ka jylla, u la hiar syndon dalade ha ka sngi balang jong ka taiew ban ïa don ryngkat na ka bynta ban ïalap election ïa u bah Polestar Nongsiej, u kyrtong jong ka party na ka 33 Nongstoiñ Assembly constituency.
Ha ka jingïalang kaba la long ha shnong Mawlangdep, ki nongïalam ka UDP na ki hynñiew tylli ki polling station kiba hap ha ka Mawlangdep zone, ki la pynlong ka jingïalang kaba heh ha kaba ki paitbah ki la tuid da ka jingthrang ban kyrshan pynjop ïa u kyrtong ka UDP ha kane ka election kaba mynta.
U bah Metbah haba kren ha katei ka jingïalang, u la ong ba haduh mynta ki paitbah jong ka jylla khamtam eh na Khasi bad Jaiñtia ki la phai khmat sha ka UDP. Bun ruh ki nongkyrshan na kiwei pat ki party kum na ka Congress, NPP, PDF bad HSPDP ki la wan ban pynïasoh sha ka UDP.
U la ong ruh ba ka UDP bad ka HSPDP ha ka election 2012 ki la ïakut ban don ka jingïaleh paralok. Hynrei ha kaba kut kam shym la long kaba myntoi, kumta ha kane ka kynti ka UDP kam banse ban ïaid la ka jong ka lynti. Nalor kata u la pynshai ruh ba lada ki paitbah ki sngewthuh ki la dei ban pyrkhat bniah, namar kumba ka long ha ka election 2018, u kyrtong ka NPP na Nongstoiñ bad u Myntri Rangbah ka jylla u Conrad Sangma ha ka por ba u wan sha Nongstoiñ, ki la pynbna thok ba kin pyllait ban tih bad shalan dewïong, hynrei kam shym la long kumta namar ka Supreme Court kam pat shah satia.
U la ong ruh ba ki paitbah kim dei ban shah pynbiej ha ki jingkular ki bym shongnia bad ki jingkular thok. U la ong ruh ba ka UDP haba ka leit ban pan jingkyrshan kam ju kren ïa kiei kiei ki bym lah ban long hynrei ka kren beit ïa ki jingshisha bad kam ju thok ïa ki paitbah.
U bah Polestar Nongsiej haba kren ha katei ka jingïalang, u la ong ba baroh ki shnong ha katei ka thaiñ ki dei kiba im ha ka rep ka riang. Kumta kum u kyrtong jong ka party lada un poi sha ka thong ha kane ka election, un thaw ki lad ki lynti bad un ïakren bad ka sorkar ba ka dei ban phai khmat kyrpang sha ki nongrep, namar ha kine ki sngi ka jingstad saïan ka la dei kawei na ki bynta ba ki paitbah ki hap ban pyndonkam ruh haba ki rep ki riang.
Nalor kata u la ong ba lada un jop ha kane ka election, ka thong jong u ka long ban ai ka jingshakri kaba paka ïa ki paitbah, ban wanrah ïa ki jingmyntoi kum ki jaka sumar, ki lad ai kam ai jam ïa ki samla bad ba un ym ñiew shilliang khmat ïano ïano ruh, hynrei ïa baroh ki jingïarap ba ka sorkar ka la mang na ka bynta ki shnong ki thaw bad ki paitbah un pynpoi lut sha ki paitbah.
Ha ka jingïalang la donlang da u bah L.G Nongsiej MDC barim ka Nongstoiñ, bah S.T Kharbani uwei na ki nongïalam ba hakhmat duh jong ka NPP ha u snem 2018, u bah Grenland Nongsiej na ka shnong Mawlangdep bad kiwei kiwei de.

Leave A Reply

Your email address will not be published.