Nongstoiñ, Rymphang, 15: Kawei ka longkmie ba la tip kyrteng ka Metilda Marshillong 38 snem ka karta na ka shnong Riangpoit Thymmai kaba don marjan bad ka shnong Risiang West Khasi Hills, ka la shah batbor bad shah pynïap dusmon ha ki runar ha ka sngi ba ar jong ka taiew ha kawei na ki jaka khlaw kaba don ha katei ka shnong.
Katkum ka khubor na ki heh pulit jong ka West Khasi Hills District, la ong ba ki la ïoh pdiang ïa ka jingujor ejahar na kiba haïing, ba katei ka longkmie kaba don san ngut ki khun, ka dei kaba im da kaba thang rnga ha kawei na ki khlaw kaba don ha katei ka shnong.
La ong ba bunsien ka ju sah ruh ryngkat bad ki khun lane bad kiba haïing hasem sha khlaw ban thang rnga. Hynrei ha ka step sngi ba ar ka la wanphai sha ïing bad mih biang ha ka por 6:30 eiei mynstep ban leit biang sha khlaw ban thang rnga.
Pynban la ong ha ka ejahar ba katba ka dang don ha lynti ban leit phai, ki riew runar ki la ap thap lypa ha ka jaka ba la tip kum ka phot kynthei, ha kaba ki la thom bor ïa ka bad hadien ba ki la bat bor, ki la shim syndon ruh ïa ka jingim jong ka.
Na ka liang ki heh pulit ha ka step sngi balang ki la hiar sha katei ka jaka ban tohkit bad ban lap ïa ka jingshisha bad ki la wanrah ruh ïa ka met ïap na ka bynta ka post mortem lashai ka sngi. Hynrei, katkum ka jinglap la ong ba katei ka longkmie ka la dep shah leh beijot bad shah pynïap pat kham hadien.
Shuh shuh la ong ba ki pulit ki la register case halor kane ka jingjia bad ha kajuh ka por, ki la sdang ban lap sabut ïa ki runar kiba leh ïa kane ka kam, ha kaba shen kin sa ïoh ban leit kem bad pynshitom katba shong ka aiñ.
