Mawkyrwat, Rymphang, 15: Ki longkmie, ki longkpa bad ki samla na kylleng ki shnong kiba hapoh jong ka Mawkyrwat Constituency mynta ka sngi ki la wan lang ban sngap ïa ki jingpynshai halor ka phang, “Ki samla bad ka imlang ka sahlang”, ha ka jingïalang ba la pynlong da ka United Democratic Party (UDP) jong ka Youth’s Wing ha phyllaw jong ka ophis treikam jong ka party ha Mawkyrwat.
Ha kane ka sngi na ka liang United Democratic Party (UDP) jong ka Youth’s Wing ki la lum khnang ïa ki paidbah khamtam eh ki samla ba kin ïoh ïa ki katto katne ki jingpynshai ïa ki mat ba kongsan ba kum ka party ka don ban pyntreikam ha kane ka kynti kaba mynta ba kumjuh ruh ïa ki mat treikam ba kum ki khun samla jong ka dong ka thaiñ kin lah ban ïeng ban tei ïa ka lawei kaba phyrnai bad ban long ruh ki samla kiba lah ban ïeng ha la ki jong ki kjat la ka long ha ki kam la jong bad ki kam ïalehkai ha ki bynta bapher bapher.
U kyrtong ka UDP na ka 36 – Mawkyrwat Constituency, u bah Renikton Lyngdoh Tongkhar haba kren ha jingïalang paidbah kaba la long ha phyllaw ka ophis treikam jong u, u la ong ba ki khun samla kim dei tang na ka bynta ka la shai hynrei ki dei jong ka mynta bad kumjuh ruh na ka bynta ka lashai. Kumta ngi la donkam ïa ki samla kiba khlaiñ ym tang ha ka met ka phad hynrei wat ha ka jingmut jingpyrkhat na ka bynta ka lashai la shisngi.
Ha kajuh ka por u la ai ka jingkhublei kaba kyrpang ïa u bah Eugenson Lyngdoh uba la kren ïa ki bynta kumno ban kyntiew ïa ki samla lyngba ki kam ïalehkai ha ki bynta bapher bapher namar lyngba ki kam ïalehkai ki samla mynta ki la lah ban ïeng ha la ki jong ki kjat, namar u bah Eugenson u la long uwei na ki khlur ïalehkai kynjatbol jong ka na ka jylla bad kane ka la long ka nuksa ïa ki khun samla.
Namarkata, u la ong, “ka jingnang jingstad kam shem la thew eh tang ban ïoh ïa ki kam sorkar, hynrei lada ngi long tang ki nongkitnong ha ïew, lada ngi don ha ka kyrdan pule ka ïapher bad u bym don ka kyrdan”.
Shuh shuh ula ong ruh ba don ki khun samla kiba sngewthuh bakla ban ong, “kam myntoi ban leit pule namar ngim ïoh kam sorkar shuh ha kane ka juk ba mynta”, bad kane ka long pynban ka jingpyrkhat kaba la ïalam bakla ïa kiba bun ki khun samla. Kumta u la kyntu ïa ki samla ba kim dei ban pynleh noh ei ha ki jingpule namar kim tip ïa ka jingim ka ban sa wan ïoh kin sa long pynban ki ‘riew khraw jong ka jylla Meghalaya.
“Nga don ka thong kaba hakhmat eh na ka bynta ban thaw lad thaw lynti ïa ki khun samla kiba don ka jingnang jingstad ha ki sap bapher bapher ki jong ki ha kaba ki dei ban phai khmat ha ki kam shimet kum ki private company namar ba ka sorkar India ka la ai lad ïa ki ‘riew shimet ban seng ki kam, kum ki jingtrei bapher bapher bad lyngba jong ki kin lah ban ïoh pynrung ïa ki ha ki kam sorkar”, ai mynsiem u bah Renik ïa ki samla jong ka Mawkyrwat Constituency bad kumjuh ruh na ka liang jong u u la don ka jingthmu ban thaw ki jaka ai jinghikai ïa ki samla khnang ba ki samla kin ïoh ban ïoh ïa ki kam ki jam hadien habud.
Kiwei pat ki nongkren ha kane ka sngi ki long u bah Commander Shangpliang uwei na ki nongshna phlim khasi, u bah Eugenson Lyngdoh, MLA ka Mawphlang Constituency uba la kren halor ki kam ïalehkai, bad u bah Edilbert Iawphniaw.
