Nongstoiñ, Rymphang 15: Ka Hynñiewtrep Youths Council West Khasi Hills District ha ka sngi balang, ka la pynlong ïa ka jingsam ïa ki kot lyngkdop jong ka seng ïa kaba lah tip kum ka ‘Rai eh daw Campaign’ ha iew Nongstoiñ. Ka phang pdeng jong kane ka Campaign ka dei ‘Jied da ka jingkitkhlieh.
Ka jingthmu jong ka seng ban sam ïa kine ki kot lyngkdop, ka long ban hikai ban pynsngewthuh ïa ki paidbah nongshong shnong, kumno ban kheiñ kor ïa ka jingthep vote lane ïa ka shi vote ba ki ai ha ka 27 tarik khnang, ba ka pateng ban wan kan long kaba phyrnai ïa ki khun ki kti khamtam ïa ka ri bad ka jaidbynriew.
Ka seng ka kyntu ban ym pynlong ïa ka jingjied ïa ki nongmihkhmat tang kum ka tamasa, ban shongshit lyngba ka jingkhawai bam, khawai kyiad bad ka shad khlem nongrim. Hynrei ka dei ka por ban rai ban weng noh ïa ka jingsynshar bym hok ban wanrah ïa ka synshar khaddar kaba khuid, kaba shai bad kaba beit.
Nangta ban pynshong nongrim ïa ki mat ki jura jong ka Jaidbynriew ha shwa ban thep vote, kum ka jingpyntrei noh ïa ka Inner Line Permit lane ïa ka MRSSA (Amendment Bill), ban ithuh noh ïa ka Ktien Khasi ha ka Riti synshar jong ka Ri India, ban pynduh noh ïa ka aiñ khalai Casino ïa kaba ka sorkar ka la shu wanrah tang ïa ka Ordinance, ïa kaba kane ka aiñ kan im biang hadien hynriew bnai, kumta kan long ka jingma.
Nangta ka jingthmu jong ka Sorkar ban wanrah ïa ka aiñ ban ailad tang ïa ki briew kiba don 100 Hectare, ba kin ïoh ban pyntrei ïa u Dewiong, kumjuh kan plie ïa ki lad ïa ki non-tribal ban knieh ïa ka khaïi pateng.
U Samla Wanteibok Lyngdoh secretary ka seng, u la kyntu ïa ki paidbah ba haba ki ïoh ïa kine ki kot lyngkdop, kim kheiñ dew thala. Hynrei da pule bha da puson janai haïing ar sien lai sien bad da pynshong nongrim haba ki pule, khnang ba kin sngewthuh shai ïa ka jingdonkam jong ki ban ai ïa ka rai ha ka 27 tarik.
