Shallang, Rymphang 15: U myntri rangbah ka jylla Meghalaya ba mynta u Conrad K. Sangma u la hiar sha sor Shahlang ban leit ïalap elekshon na ka bynta u bah Gigur Myrthong kyrtong MLA jong ka seng National People’s Party na Mawshynrut konstitwensi.
Ïa katei ka jingïalang la pynlong ha madan shnong Songsak Shahlang West Khasi Hills District, ha kaba la ïohi ruh ïa ki hajar ngut ki paidbah, ki la wan ban ïashim bynta lang ha katei ka jingïalang ban sngap ïa ki jingkren utei u myntri rangbah.
Ha katei ka jingïalang la ïadonlang ruh u bah Gigur Myrthong MLA ba mynta ha kajuh ka por u ba dei ruh kum u kyrtong MLA jong ka seng National People’s Party na ka Mawshynrut Konstitwensi, nangta u bah H.L Nongsiang MLA barim katei ka thaiñ u bah Nondi Diengngan MDC barim ka Nongstoiñ bah Morningstar Mawsor MDC barim ka Mawshynrut konstitwensi bad kiwei kiwei.
Ha katei ka jingïalang la ïoh ban pynïasoh ruh bun ngut ki briew kiba na kiwei pat ki seng kynthup ïa u bah Roland Mawsor bad la pdiang burom ïa ki da u Conrad K Sangma.
Haba kren kum u kongsan u Conrad u la ong, “Kum ki nongïalam jong ka jylla ngi dei ban pyntikna ban ym pharia ïa ka jylla lyngba ka jingpynsngew pher jaidbynriew. Hynrei ngi dei ban don da ka thong ban pynïatylli. Nga dei u kyrtong jong ka NPP, hynrei hadien ba la jop ka elekshon ngam dei shuh u kyrtong MLA jong ka seng NPP, hynrei nga la dei u MLA jong ka konstitwensi kynthup ïa kiba la thep vote ïa nga bad ïa kiba khlem thep ha nga ruh kin dei ki jong nga”.
“Nga sngew tynnad ban ïoh sngew ba u bah Gigur Myrthong u la long shisha u MLA jong phi ba u leh bha ha ki shnong kiba khlem thep bun ki vote ha u. U dei ruh u ba don ka jingkitkhlieh na ka bynta ki paidbah nongshong shnong khlem shah liang shano shano ruh”, u la ong.
Shuh shuh, u la ong ruh, “Kiwei ki seng saiñ pyrthei balei ki ïalap elekshon da ki kyntien ban pharia jaidbynriew. Kane kam dei ka por ban leh politik da kaba pharia jaidbynriew, namar da ka jingïatreilang ngin jop bad ngin poi sha ka thong ban pynwan dur ïa ka jylla Meghalaya. Nga don ka jingthmu ban pynwan dur ïa ka jylla kum ka jylla kaba kham pher bad kham shai ban ïa kiwei pat ki jylla.”
