Ka jylla Meghalaya kaba la kynjoh sha ki mawmer ka jingïaid lynti kaba la 50 snem kynthih naduh ba la ïoh ïa la ka jong ka jylla lehse kan dang long pat ka jylla kaba dang sahdien bha ha kiba bun ki liang lada ïa nujor tang bad kiwei pat ki jylla rit kiba don hapoh ka thaiñ Shatei Lammihngi.
Ïano yn kynnoh halor kane ka jingsahdien jong ki shnong ki thaw ha ki 60 tylli ki Constituency hato ki paidbah ki jied ïa ki Nongmihkhmat ne ïa ki Nongmihkpoh? Ka jingsahdien jong ka Jylla ha ka liang ka pule ka puthi, ka surok ka lynti ka synkien, ne ha ka koit ka khiah lada ïakren ïa ka jingshisha hi ka dei ka jingbym phai khmat jong ka Sorkar. Kiba bun hi ki shnong kin sakhi ïa ki jingshisha namarba ka jingdon jong ki Kynhun Niam bapher bapher kiba trei miet la bad sngi ha ki shnong nongkyndong ka la ïarap haduh katta katta ban pynkylla dur ïa ka jingim jong ki paidbah. U synñiang u bynhei uba ki Kynhun Niam ki la noh sha u sup u thiar jong ka imlang ka sahlang u long u bym lah shuh ban ñiewtang. Kiba bun hi ki paidbah nongshong shnong ha ki shnong nongkyndong ki kham ïoh jingmyntoi bad ki ïohi ïa ka jingshai tad ynda la iuhkjat jong ki kynhun Niam kiba trei shitom ban peit ïa ka bha ka miat jong ki paidbah la ka long ha ka Koit ka Khiah, ha ka Pule ka Puthi ne phin ong ha kaba buh ïa ki shlem ai jinghikai ha ka rep ka riang ne ha kino kino ki liang.
Balei ka Sorkar ka syntan eh haduh katne? Balei ki Nongmihkhmat kiba u paidbah u la pynphong pansngiat ki leh beiñ pat ïa la ki jong ki nongthep vote? Ki paidbah ki dei ban da bishar bha ha ka por elekshon khnang ba ka lut san spah bad ka lut ar hajar kin ym kren briew namarba ka jingeh bad ka jingsahdien kan ap hi ïa ki paidbah lada ki shah pynkbum da ka bor pisa ha ka por elekshon.
Ki 49 snem kiba ka Jylla Meghalaya ka la ïaid lynti shwa ban dap 50 snem ki dang dei hi tang ki lynti kiba jwat bad kiba eh namar haduh mynta hi ka Jylla kam pat don ïa u pud u sam uba biang, ki surok rong bad ki lynti ki synkien kiba biang, ki jaka sumar kiba biang ki tiar ai jingsumar ïa ki paidbah, ki jaka pule kiba biang ne watla ka jong ka University bad ka Medical College, ka umbam umdih kaba biang bad bun ki jingduna suda haba phai sha baroh ki liang.
Lada rung ha ka Ophis baheh tam ha Main Secretariat ka Sorkar ka kloi ban pushara pynbhabriew bad ban shna pynbha ïa kajuh shi kajuh ka jingshna kaba ladep shna bad ïa ka madan ruh la siang da ki Tiles, hynrei ka long kaba pat kaba sangsot haba phai sha ki shnong nongkyndong namarba ki surok ki long kum ki lynti khlaw bad ki surok ïaid mrad kiba dap da ka jyrsieh ha ka por lyiur.
Ka jingkylli kaba mih mynta ka long, ba balei ki Nongmihkhmat ynda ki la shong ha ki shuki bajem mom mom ha Main Secretariat ki klet ban peit ïa ka eh bad ka khia ka shon jong u paidbah? Hato ka Sorkar kam don pisa ne don da kiwei pat ki daw kiba pynlong ïa ka Sorkar ban shu leh meinah ïa ki shnong nongkyndong ne wat ïa ki shnong kiba don ha khap sor? Kaba kham isangsot shuh shuh ka dei ka jingsahdien kaba palat liam jong ki shnong nongkyndong kiba don ha ki shnong khappud ka Jylla Assam bad ka ri Bangladesh. Katba shaba phai na mihngi ne sha sepngi ki paidbah ki mad ïa ki sohkyrdot kiba jwat tam ha ka jingim jong ki namarba ki Nongmihkhmat ki leit shang suwari sha kine ki shnong tang shisien ha ka san snem.
Khlempep ki nongshong shnong jong ka Jylla ki dang ïohi ïa ki kam pynroi bad ïa ki jingtrei kiba ratbha bha mynba ka Sorkar Meghalaya United Alliance (MUA) ba la ïalam da ka Seng Congress bad u Dr. Mukul Sangma kum u Myntri Rangbah ki dang paw ki dak ki shin ïa ki jingtrei baratbah jong kane ka Sorkar ban wanrah ïa ki surok ar laiñ bad saw laiñ, ka jingpynkha ïa ki Polisi treikam ki bapher bapher, ka jingpynbna ïa ki Mishon bapher bapher kiba ïarap ban kyntiew ïa ki nongrep bad ïa ki nongri jingri ha ka jylla bad kiwei kiwei ki lad pynroi kiba pynlong wat ïa ka Sorkar Pdeng ban peitsiar bha na ka sngi sha ka sngi.
Lah ban ong ba ka jingsynshar jong ka Sorkar MDA ba ïalam da ka NPP bad u Conrad Kongkal Sangma kum u Myntri Rangbah ka long kaba tlot haduh katta katta bad kaba mad ruh ïa ki jingïakhih paidbah kiba naduh kaba sdang bad sa ka jingwan lynshop tyngeh jong ka jingpang Khlam Coronavirus jin ar snem kynthih.
U paidbah hi u dei ban peitmat bad u donkam ban khan bad ban bishar bha ïa ki jingtreikam jong ka Sorkar MDA ban ïoh khein jingkheiñ bad ban ai jubab ha kane ka samoi jied syiem shisien san snem.
