Shillong, Rymphang 15 : Ka Hurldles CC ka la bteng khur nam jop ha ka lympung ïalehkai 2nd District League T20 Cricket Tournament 2023 ba la pynïaid da ka East Khasi Hills Cricket Association (EKHCA) ha ka jingïalehkai ha ka sngi Balang.
Ka Hurldles CC ka la khur jingjop da kaba pynliem da 7 wicket pyrshah ïa ka Lumpaia Avengers CC. Haba phai sha ka jingïalehkai, ka Lumpaia Avengers CC kaba la jop ïa ka jingkynting pisa ka la kam trai ban tied nyngkong bad buh ka thong da 110 ron khyllem noh 10 wicket ha ki 17.5 over.
Dei tang u John Cliff Shabong uba la kamai bun ron napdeng ki rangtied da kaba kamai 22 ron na ki 23 bol bad u Shimonto Hajong marwei u khur 4 wicket ai kamai 17 ron ha ki 3.5 over na ka bynta ka Hurldles CC.
Ka Hurldles CC haba wan beh ïa katei ka thong ka la lah ban pyndep tang ha ki 17 over da kaba kamai 114 ron duh noh tang 3 wicket. U Arwanbiang Shangpliang u kamai 45 ron na ki 53 bol bad u Miquel Obando Nongbri u ïoh 1 wicket ai kamai 15 ron ha ki 3 over na ka bynta ka Lumpaia Avengers CC.
Ha ka jingïakhun hapdeng kitei ki ar tylli ki team, ïa ka na Player of the Match la ïoh ra da u Arwanbiang Shangpliang jong ka Hurldles CC uba kamai 45 ron na ki 53 bol.
Shuwa kane, ha ka jingïalehkai kaba nyngkong ka la long hapdeng ka Thangsning SCC pyrshah ïa ka Thynroit SCC, ha kaba ka Thynroit SCC kaba la jop ïa ka jingkynting pisa ka la kam ban tied nyngkong bad kamai 74 ron duh noh 7 wicket ha ki 15 over.
U Mandari Dkhar u kamai bun ron tam na ka bynta ka kynhun da 30 ron na ki 37 bol bad u Oristotle Nongkhlaw u ïoh 2 wicket ai kamai duna ron da 10 ron ha ki 3 over na ka bynta ka Thangsning SCC. Haba beh ïa katei ka thong ka Thangsning SCC ka la lah ban pyndep tang ha ki 13.4 over da kaba kamai 75 ron duh noh 4 wicket.
U rangtied uba la kamai bun ron na ka bynta ka Thangsning SCC udei u Badap Pura Nongkhkaw u kamai 27 ron na ki 25 bol ha kaba ka kynhun ka la pynliem da 6 wicket. U Mandari Dkhar u ïoh 2 wicket ai kamai 20 ron ha ki 2.4 over katba ïa ka nam Player of the Match la ïoh rah da u Badap Pura Nongkhlaw.
