Pynpaw ki samla bad khynnah skul ïa ka sap dro ha ka jingrakhe ïa ka International Water Conclave ha Ri-Bhoi

Nongpoh, K’Lyngkot, 31: Ki samla ryngkat ki khynnah skul na Ri-Bhoi District mynta ka sngi kila shim bynta shitrhem haka jingïakop dro kaba dei shibynta shuwa ka jingrakhe ïaka International Water Conclave shaphang ka jingkordor jong ka um ban tyngkai bad ban pynneh-pynsah ïa ka na ka bynta ka lawei khamtam eh ha kine ki jylla ri lum jong ngi bala pynlong ha District Library ha Nongpoh.
U Bah MB Tongper Additional Deputy Commissioner ka Ri-Bhoi District u la pyntip ba kane ka dei ka bynta ba nyngkong haka District Level ha kaba yn sa jied ïaki nongdro kiba tbit tam ki ban ioh pat ban leit shim bynta ha ka State Level. Shuh shuh kin sa don ruh kiwei ki jingïakop naduh ka Quiz, Public Service Announcement, Slogan Writing bad kiwei kiwei haka 3 tarik Rymphang naduh ka por 11 baje ha Science Hall.
U la ong ruh ba katei ka jingïakop ka dei shibynta jong ka prokram International Water Conclave 2024 ka ban sa long ha nongbah Shillong haka 9 bad 10 tarik Rymphang ha kba ïa ki 3 ngut ki nongjop ha katei ka competition yn phah sha ka state level bad ïa ki nongjop yn ai buskit Rs.20,000/-, Rs.15,000/- bad Rs.10,000/- ïa u ba wan nyngkong, ba-ar bad ba-lai.