Shillong, K’Lyngkot 31 : U Myntri Rangbah ka Jylla, Conrad K Sangma hynne ka sngi Balang u la ong ba dei na ka daw ka elekshon MP ba ki la pynlong kloi ïa ka Dorbar Mangtyngka jong ka Iing Dorbar Thawaiñ mynta ka samoi.
Haba kren bad ki lad pathai khubor hadien ka prokram ha Don Bosco Youth Centre, u Myntri Rangbah u la ïathuh ruh ba lada jia ba ka Election Commission jong ka Ri ki pynbna noh ïa ka tarik elekshon MP, ka jylla kan ym lah satia ban mynjur ïa ka mang tyngka kaba pura.
“Ban kiar na kaba wanrah ïa ka jingmang tyngka ba shipor (Vote on Account), ngi la rai ban khot kloi ïa ka Dorbar Mangtyngka khnang ba ngin lah ban mynjur ïa ka mangtyngka kaba pura,” bynrap shuh shuh u Myntri Rangbah.
Lah ban kdew hangne ba la pynbna ba ka Dorbar Mangtyngka jong ka Iing Dorbar Thawaiñ ka jylla kan sdang naduh ka 16tarik mynta u bnai Rymphang.
Na ka liang ka Business Advisory Committee (BAC) ban pynïaid da u Lamphang ka Iing Dorbar Thawaiñ ka jylla, Thomas A Sangma kan long mynta ka sngi Palei na ka bynta ki sngi long Dorbar.
