Khliehriat, K’lyngkot, 31: U Myntri ka Sorkar Jylla Bah Kyrmen Shylla uba long ruh u MLA jong ka Khliehriat Constituency ha ka sngi Balang u la plie paidbah ïa ka jingkieng ïaid kjat (Suspension Bridge) ha shnong Tuberkmaishnong ba la shna ha ka jinglut kaba kot T. 95 lak.
Kum ba hynniewphew na ka shi spah na ki nongshong shnong jong ka shnong Tuberkmaishnong ki dei kiba im da ka rep ka riang. Kane ka jingkieng kan ïarap shibun eh ïa ki nongrep kiba hap ban jam na shi liang sha shiliang ka wah Myntdu bad ha kajuh ka por kane ka jingkieng ka dei kawei ruh kaba lah ban khring ïa ki nongjngohkai pyrthei kiba wan sha East Jaiñtia Hills District.
La pynwandur ïa kane ka jingkieng kaba jrong 120 mitar da ka jingbei tyngka na ka Mahatma Gandhi National Employment Guarantee Scheme jong ka shnong, na ka tnat District Rural Development Agency (DRDA), ka Meghalaya Basin Development Authority (MBDA) bad na ka District Mineral Funding (DMF).
Haba kren kum u Kongsan, u Bah Kyrmen Shylla u la ïaroh ïa ki nongpynïaid shnong jong ka shnong Tuberkmaishnong, naduh u Waheh shnong bad ïa ki Waheh Shnong barim, namar kano kano ka kam ba ki leh ka dei beit na ka bynta ka jingbit jingbiang jong ki paidbah nongshong shnong.
Halor ka jingpan surok jong ka shnong Tuberkmaishnong, u Bah Kyrmen u la kyrpad ïa ka shnong bad ïa ki paidbah ba kin ïaishah shi por bad ong ba ka surok ka ban poi sha Khloo-blai Tuber ruh ka dang sahteng kaba donkam ban pyndep.
U la ai ka jingïaroh ïa u Deputy Commissioner A. Baranwal uba don ka jingïadei kaba jan bad ki paidbah ka district bad uba trei shitom ban wanrah ïa ka roi ka kiew hapoh ka district.
“Hapoh hapoh ka jingïalam jong u Deputy Commissioner, la lah ban plie paidbah bun tylli bha ki projek hapoh ka East Jaiñtia Hills District ha kaba wat ka nongbah Shillong ruh kam pat lah ban ïoh bun ki skim pynroi kumba ïoh ka East Jaiñtia Hills District bad kane baroh ka dei namar ka jingstad jong u DC ban wad ki lad ki lynti ban kyntiew ïa ka district,” la ong u Bah Kyrmen Shylla.
Ka shnong ka la pynkup burom ruh ïa ki samla jong ka shnong Tuberkmaishnong kiba la wanrah burom da ka jingïoh khur takma ha ka Meghalaya Game kaba dang shu dep pynlong shen ha Tura
U A.Baranwal, haba kren kum u symbud kongsan u la ong, ba u Waheh Shnong jong ka shnong Tuberkmaishnong Bah Miki Lyngdoh u dei uba treishitom ban kyntiew ïa ka shnong ka thaw bad uba wan ban pynsngew ruh ïa ka jingeh ki paidbah nongrep kiba ju jam sha shiliang kane ka wah Myntdu kaba buh jingeh bad buh jingma ïa ka jingim khamtam ha ka por lyiur ba jur slap bad kumta u la kyntu ïa u Waheh Shnong ban ai jingkheiñ halor ka jinglut jingsep ban shna da ka jingkieng bad u la wad ki lad ki lynti haduh ban da lah ban pynurlong ïa kane ka jingkieng ïaid kjat kaba itynnad bad kaba ai jingmyntoi ïa ki paidbah.
U DC u la ai khublei ruh ïa u Bah Kyrmen Shylla uba ju kloi ban ai ka jingïatreilang bad uba ju kyrshan haba don kano kano ka jingeh kaba na ka liang u Deputy Commissioner um lah shuh ban leh eiei bad haba phaikhmat sha u Bah Kyrmen um ju kyntiat ban ïarap kaba dei na ka bynta ka bha ka miat jong ki paidbah ha ka district.
U la ai khubei ruh ïa ka Village Employment Council (VEC) jong ka shnong Tuberkmaishnong kaba la ai ka jingïatreilang na ka bynta ka jingbit jingbiang ki paidbah.
U Addl Deputy Commissioner ka district Bah G.Warjri uba dei ruh u Project Director jong ka DRDA East Jaiñtia Hills District, u la ong ba kane ka jinglah ban pynurlong ïa kane ka jingkieng kan long ka jingmyntoi ïa ki paidbah ka shnong Tuberkmaishnong khamtam eh ki paidbah nongrep namar mynta ki la ïoh da kane ka jingkieng ban kit ïa ki tiar rep, ki mashin bad ki marrep jong ki na shi liang sha shiliang kane ka wah.
U la ong ba kum kine ki jingtei ki long ruh kiba wanrah jingmyntoi ruh namar ki long kum ki jingtei sah nam kiba long ruh kum shibynta ban kyntiew ïa ka kam jngohkai pyrthei namar kane ka shnong ka don ki jaka jngohkai pyrthei kiba itynnad bad ki jingtei ba sah nam.
