Shillong, K’lyngkot, 31: Da kaba buh hakhmat ïa ka thong ban ïoh ïa ka lyer kaba khuid bad ban ïohi ïa ka jingjyrngam jong ki khlaw ki btap, ka Khasi Hills Autonomous District Council (KHADC) ryngkat ka jingïatreilang bad ka Meghalaya Basin Development Agency (MBDA) ki la pynsdang ïa kawei ka project kaba la tip kum ka Agro Forestry Carbon Credit Scheme.
Halor kane ka jingthmu, ki don 28 ngut ki nongrep kiba la wan shakhmat ban rejistar ïa la ka jaka jong ki ban ïoh ïa kane ka skhim ha kaba kin ïoh jingmyntoi ha ka shi snem kan ym duna ïa ka T. 15 hajar nalor ki mar rep kaba ki la ïoh ban pynïaid iew.
Ha kane ka sngi la sakhi lang da ki khlieh nongsynshar jong ka Hima Mylliem bad na ka Hima Khyrim nalor ki nongïalam jong ka IORA Ecological Solution Private Limited bad ki ophisar ka District Council na rilum Khasi bad na rilum Jaiñtia.
