Pynlong ka Meghalaya Social Development Society da ka prokram “People Education”

0

Shillong, Lber :Ka Meghalaya Social Development Society (MSDS), Shillong ka la pynlong ïa ka prokram “People Education” (PEP) ha ka 24 bad 27 tarik mynta u bnai ha Martin Luther Christian University (MLCU), Nongrah Shillong.
ïa kane ka prokram la bei tyngka da ka State Office, Khadi & Village Industries Commission (KVIC), Shillong. ïa kane ka prokram ba ar sngi la pynkut noh ha ka 27 tarik mynta u bnai ha kaba u Director, KVIC, Bah Mange Ram u lah long u kongsan.
Haba kren ha kane ka sngi kum u kongsan, U Bah Mange Ram u la pynpaw ïa ka jingbynñiaw ba ka skim jong ka sorkar kmie kaba la tip kum ka PMEGP (Prime Minister Employment Generation Programme) ka khlem lah ban pyntreikam bha ha ka jylla Meghalaya haba ïa nujor bad kiwei pat ki jylla ha ka ri.
U la bynrap ba ka daw kaba hakhmat eh ka long ba ki nongthep ïa kane ka skim ki duna palat. ïa kane ka skim la pyntreikam da laitylli ki tnat Sorkar, kata ka KVIC, DCIC, KVIB, hynrei ka khlem lah ban pynurlong katkum ka jingkhmih lynti ka Sokar kmie. U la pynpaw ba ngim dei ban long tang ki nongwadkam hynrei ki nongai kam ïa kiwei pat. U la khot bad wer ïa ki nongshong shnong khamtam kito kiba don jongthmu ban sdang ki kam lajong ban shim ïa kane ka skim kaba long ka jingïarap ïa ki.
I Prof T. K Bamon, Vice Chancellor ka skul bah Martin Luther Christian University haba kren kum I symbud kongsan I la pynpaw ba ka jingkren bad ka jingpynshai na ki tnat treikam ka sorkar ka la aijingmut bha ïa ki khynnah khmatam lei lei kito kiba don shisha ka jingthmu ban pynbtit shuh shuh ïa lade ha ki kam bapher bad ban long ki nong sengkam da kaba shim ka jingkitkhlieh ha lade na ka bynta ka bha ka miat ka ïing ka sem bad ka imlangsahlang. I la kyntu ïa ki khynnah ba shim ïa ki jinghikai u Kpa ka Jaitbynrew, u Mahatma Gandhi ban shakri ïa ka im lang sahlang da ka jinglen lade bad da ka jingieit.
Kiwei pat kiba aijingkren ha kane ka sngi kynthup ïa u Bah Richard L. Nongbri, IPO, DCIC, Shillong halor ka phang ki skim bad ki training bapher bapher na ka liang ka DCIC, Bah Dipankar, NCERT counselor bad Faculty member Nehru Yuva Kendra Sangathan (NYKS), Ka tnat ka kam ïalehkai ka sorkar kmie uba kren shaphang ka bynta ka NYK na ka bynta ki khynnah samla bad Bah Randhir Kumar, Manager SBI Regional One uba la kren shaphang ka lad ka lynti ïoh kam ïoh jam ïa ki khynnah ka ki bank.
ïa ka phang pdeng jong ka prokram la kren da u Bah A. Nongkynrih, President Meghalaya Social Development Society (MSDS), Shillong. ïa ka prokram la pynïaid da I Asst Mebaaihun Shisha Sunabi, HoD, Dept. of Environment and Traditional Ecosystems.
Kiba la ïa donlang ha kane ka sngi ki kynthup ïa I Bah S. Majaw, GM, DCIC, Shillong, Bah Modon Lyngdoh, Junior Executive, KVIC, Shillong. Ki nonghikai bakhliehduh jong ki department bapher bapher, ki staff ka MSDS, ki staff ka MLCU bad ki khynnah pule kiba la don palat 100 ngut.
Ha kane ka sngi la sam ruh ïa ki khusnam sha ki nong jop ha ka essay bad debate da u Kongsan u Mange Ram. La pyniphuh iphieng ïa kane ka sngi da ka jingrwai na ki khynnah ka MLCU.Kane ka long katkum u kyrwoh lyngba u Bah Albinus Nongkynrih President – MSDS.

Leave A Reply

Your email address will not be published.