Pynlong ka BSF ïa ka Civic Action Programme, ka lympung phutbol & Medical Camp ha ki thaiñ khappud

SHILLONG, Lber 26: Haba pynpaw ïa ka jingshimkhia jong ka na ka bynta ka bha ka miat jong ki paidbah khappud, u Vinod Yadav, Commandant jong ka 200th Battalion, Border Security Force (BSF), ha ka 25 tarik u Lber, 2025 (sngi Ba ar), u la plie paidbah ïa ka Civic Action Program kaba saw sngi ha Upper Primary School, Rongra.
Ha kane ka jingïalehkai phutbol ha Rongra la wan ban ïashimbynta da ki 10 tylli ki kynhun na ki shnong ha ki thaiñ khappud ba marjan, kaba la sdang naduh ka sngi Ba ar.
La khmihlynti ruh ba ki lympung ïalehkai volleyball bad badminton ban wan ha Baghmara ba kin sakhi ïa ka jingïashim bynta kaba shit rhem, kaba nang pynkhlaiñ shuh shuh ïa ka mynsiem ïatreilang bad ka imlang sahlang bad ka jingïalehkai ha ka thaiñ.
Lait na ki BSF, ka jylla Meghalaya ka ju pynlong man ka por ïa ki jaka sumar khlem jingsiew, ki jingïalehkai phutbol, bad kiwei kiwei ki kam ha ki shnong khappud bapher bapher. Kine ki jingthmu ki long ban pynmyntoi ïa ki paidbah katba ki pynkhlaiñ ïa ka jingïatylli bad ka jingieid ri hapdeng ki nongïashim bynta.
Kane ka jingthmu ka thmu ban kyntiew ïa ka bha ka miat jong ki paidbah kiba shong basah ha khappud India bad Bangladesh da kaba pynbiang ïa ki tiar ba donkam bad ki jingïarap ha ka liang ka koit ka khiah.
Ha kane ka prokram, ki BSF Meghalaya ki la sam dawai sha ki shnong khappud bapher bapher, kaba la ai jingmyntoi ïa palat 600 ngut ki nongshong shnong ka thaiñ lyngba ka Medical Camp.
Kum shi bynta jong kane ka prokram la sam ïa ki tiar thoh kot, ki tiar ïalehkai, bad ki pla skul sha ki khynnah skul na ki skul bapher bapher ha ka thaiñ khappud.
Kane ka jingthmu ka pyni ïa ka jingaiti lut jong ki BSF Meghalaya ban shakri ïa ki nongshong shnong ha khappud bad ban pynroi ïa ka jinglong babha hapdeng ki nongshong shnong.
Ki BSF ki dang ïai bteng ban ïada ïa ki khappud jong ka jaitbynriew katba ki dang noh synñiang shitrhem na ka bynta ka bha miat bad ka roi ka par jong ki briew kiba sah ha ki jaka ba jngai bad ki thaiñ khappud.