Shillong, Rymphang 24: Ka Royal CC ka la khur jingjop da kaba pynliem ïa ka Langsning CC haka Shillong Cricket League Super Division 2024-25 ba la long hynne ka sngi Nyngkong ha madan kriket ha Polo. Ha kane ka jingïalehkai ka Royal CC ka la jop suk da 108 ron ha kaba u Bipin Ray u la khur ïa ka nam Player of The Match.
Hadien ba jop ïa ka jingkynting pisa (toss) ka Langsning ka la aiti ïa ka Royal ba kan tied nyngkong, bad na ka liang jong ka Royal CC ka la lah ban kamai 198 ron shuwa ban khyllem baroh 10 wiket naki 38.4 ober.
U Pringsang (48 ron naki 39 bol) bad u Swastik Chettri (47 ron naki 78 bol) ki la long kiba kongsan tam ha ka tied na bynta ka Royal CC. U Rony Nongrum u la khur 3/49 naki 8 ober, katba u Aaron Nongrum u la khur 2/49 naki 8 ober.
Haba pyrshang ban beh ïa ka thong ka Langsning ka la shah khanglad noh da tang 90 ron naba khyllem lut baroh 10 wiket haki 22.1 ober, dei tang u Aaron Nongrum (14 ron naki 24 bol) bad u Abhishek Kumar (12 ron naki 31 bol) kiba la kham seisoh ha ka tied na bynta ka Langsning.
U Sikander Kumar u la khur 4/23 naki 4.1 ober, katba u Bipin Ray u la khur 3/16 naki 8 ober kaba la biang ïa u ban khur ruh ïa ka khusnam Player of the Match ha kaba u la pynthikna ba ka kynhun kan jop suk da 108 ron.
