Ka jingbym pyllait ka sorkar ïa ka scholarship dei ka jingpynduh ka hok ki samla pule, ong u MDC Tura

Shillong, Rymphang 23: U MDC ka BJP na Tura u Bernard N Marak ha ka sngi U Blei u la ong ba ka jingkyntait ban pyllait ïa ki scholarship sha ki samla pule ha ka jylla ka dei ka jingkyntait, ka jingshetkylla bad pynduh ïa ka hok jong ki samla pule Scheduled Tribe ïa kaei kaba ki dei ban ïohlad.
Ha ka jingkren, u Marak u la kynnoh da kaba ong, “Nga la wad jingtip na ka Tribal Ministry halor kane ka jingpynslem ban siew ïa ka baibam sha ki samla pule la ïathuh ba ka thup ba la phah da ka sorkar jylla lah dep ban pynkhuid bad pyllait bad shimkhia eh hakhmat. Ha kawei pat ka liang ka, 90% kaba ka sorkar pdeng ka siew ym lah phah sha ki account ki samla pule katba ka 10% ba dei ban pyllait ka sorkar jylla kam pat siew.”
“Ka jingpynslem ka sorkar jylla ban pynlait ïa ka thup kyrteng ki samla bad kumjuh ruh ïa ka 10% kaba la ïalam sha ka jingkulmar bad ka jingslem ban pyllait ïa ka scholarship ha kaba ka la pynduh ïa ka hok jong baroh ki samla pule. Ka jylla ka ot noh ïa ka Cess tax kaba 4% na ki mobile recharge jong ki samla pule manla ka bnai ha kaba kane ka la poi da ki klur naba uwei u samla pule ST u recharging la kumno kumno T. 300 ha ka shibnai bad haba kheiñ ba la shah ot ka khajna (Cess tax) ha ka shibnai ka la poi T. 12/- bad kane ka leit sha ka sorkar,” u la kynnoh.
Haba pynpaw ba ka jylla kam lah ban pyllait ïa ka 10% ka long ka jingkylli kaba heh bha, u Marak u la bynrap, “La kyrpad ïa u Myntri Rangbah ka jylla bad u Myntri ka tnat pule puthi ban pynbeit ïa kane ka jingeh naba bun na ki samla pule ki wan na ki longïing kiba tlot ka ïoh ka kot. Lada ka sorkar ka buh hakhmat eh ïa ka pule ka puthi kumba ka la kular ha ka por ïalap elekshon, kumta dei ban shwa hakhmat eh ïa ka bha ka miat ki samla pule ka jylla.”