Shillong, Rymphang 23: U Myntri Khynnah ka sorkar pdeng uba khmih ïa ka tnat External Affairs bad Textiles u Pabitra Margherita ha ka sngi saitjaiñ u la ong ba ka Meghalaya bad ka thaiñ shatei lamihngi baroh kawei ka la paw ha ka kyrdan kaba long pdeng jong kane ka ri hapoh ka jingïalam ka sorkar NDA ba ïalam da ka BJP.
Haba kren sha ki lad pathai khubor u Margherita u la ong ba u Myntri Rangbah duh dalade u la wanjngoh ïa kane ka thaiñ shatei lammihngi kaba kynthup ïa ka Meghalaya la palat 65 sien.
U la ong ba ki jingai jingïarap na ka bynta ka Meghalaya ka la kiew da 105 per cent kaba la long T. 40,452 klur kumba long haduh mynta haba nujor ha u snem 2014 kaba long T. 19,700 klur.
“Ka jingpyllait ïa ka khajna mynshwa ha katei ka snem ka la long T. 7273 klur na ka bynta ka Meghalaya hynrei mynta ka la kiew 572% kata ka la long T. 48,883 klur.”
Haba pynpaw ba ka Meghalaya ha baroh ki bynta, u Myntri u la ong, “Ban kyntiew ïa ki kam pynroi ha Meghalaya ka sorkar u Modi ka la ïasnohkti lang bad ki nongshong shnong ka Meghalaya bad ka sorkar Meghalaya.”
Katkum ka jingpynpaw jong u, ka jylla ka la ïoh ruh ki jingsam bynta na ka sorkar pdeng halor ki scheme bad project.
“Hapoh ka PM-DEVINE scheme, 4 tylli ki surok ha New Shillong Township, Skywalk bad tourist hub ha Mawkdok, IT Park ha Tura la dep ban mynjur. Kumba 540 km ka National Highway la tei ha Meghalaya naduh u bnai Ïaïong 2014. Hapoh ka North East Special Infrastructure Development Scheme (NESIDS) kiba bun ki projek la dep mynjur ha Meghalaya, ki don 7 tylli ki surok bad ki projek jingkieng kiba shongdor T. 459 klur, 116 ki project nalor ki kam shna surok ba T. 1737 klur, ka jingpyntreikam ïa ka Shillong Airport hapoh ka UDAN bad ka Meghalaya ka la ïoh jan T. 1300 klur ha u snem 2024-2025 hapoh ka special assistance hapoh ka capital investment,” u la ong.
Haba ithuh ïa ka jinglong kongsan ka kam jngohkai ha ka jylla u Myntri u la ong, “Naduh u snem 2014, ka sorkar Modi ka la mang palat T. 29 klur hapoh ka Pilgrimination and Spirituality Augmentation Drive kata kadei ka Prasad Scheme bad T. 184 klur ban wanrah kam pynroi sha ka thaiñ shatei lammihngi hapoh ka Surya Darshan scheme bad ka dang bteng haduh mynta.”
Haba ïathuh shaphang ki kam ba kongsan hapoh ka union budget 2025-26, u la ong, “Ki don 4 tylli ki kam ba hakhmat ban pynlong ïa ka Meghalaya ka Viksit Meghalaya ban pynlong ruh ïa ka India Viksit Bharat. Kine ki kynthup ïa ka rep ka riang ban kyntiew ki jaka ba sha nongkyndong, MSME ka dei kaba sengkam lajong bad kaba thaw ïa ki kam, ka MSME ka dei ka bor kaba ïalam sha ka jingkiew ka ïoh ka kot, bad kane ka mang tyngka ka pynleit jingmut ha ki 4 tylli ki kam ba kongsan kum ha ka khajna, ki kam bording, ki kam pynroi sor, ka kam pla tyngka, ka kam mining, ban pynkupbor ïa ki nongshong shnong middle class na ka bynta ka jingbha ka la shai.”
“Ban pynkupbor ïa ki middle class ngi don u pud ban pynduna ïa ka jingot ïa ka khajna na ka bynta ki briew kiba la rangbah na ka bynta ka jingbha jong ki bad ïa kane la kyntiew arshah na kaba mynta kaba long 50,000 sha ka T. 1 lak, kaba long ha ka shisnem T. 2.4 lakh halor ki kam ai wai la kyntiew sha ka T. 6 lak bad nil tax slab halor ka jingïoh kaba long T. 12 lak naba mynta kaba long T. 7 lak.”
U la ong ba ka sorkar ka kwah ban pynkupbor ïa ki samla lyngba ka world class education da kaba bynrap, “Ka pule puthi ka dei ka kam kaba hakhmat bad ha ka mang tyngka la pynbna ban thaw haduh 50,000 tylli ki Atal Tinkering Labs ha ki skul sorkar ha kine ki 5 snem ban wan khnang ban pynïoh ïa ki kam saïan hapdeng ki samla pule.”
Na kane ka 50000 ki Atal Tinkering labs ka Meghalaya ruh kan ïoh katto katne ki Atal Tinkering Lab.
U la pynbna ba 75000 ki additional seat yn sa ai sha ki medical college. U Margherita u la ong ba hapoh ka scheme kaba ha ki MSME, ka Meghalaya kan ïoh lang ki jingmyntoi.
“Ïa ki start-ups credit guarantee yn sa bishar biang na ka T. 10 klur sha ka T. 20 klur bad ka jingai mang kaba thymmai ka ban pynïar ïa kane ka jingsam jong ka T.10,000 klur ha kaba kane kan kyntiew ïa ki MSME ka India ha ka ïew ka pyrthei,” u la ong.
“Ban kyrshan ïa kiba duk ha ki sor bad ki kynhun kiba tlot, ka mang tyngka ka la pynbna ïa ki skhim ban kyntiew ïa ki nongtrei ha sor ban ïarap kyntiew ïa ka jingïoh jong ki, ba kynthup ruh ïa ki nongbah ka Shillong kin ïoh jingmyntoi,” u la bynrap.
U la ïathuh ba haduh u snem 2014, ki la don ki national highway ha NE ka la long 10905 km – 11,000 km. Ha u snem 2014 tang hapoh kane ka samoi treikam ki surok ki la don haduh 10900 km.
“Ha ka samoi treikam jong u Modi 190 tylli ki project shna surok kaba jngai 3856 km ha ka jinglut kaba T. 80,580 klur kiba dang don hapdeng ka jingshna ha NE,” u la bynrap.
