Pynim ka Lajong ïa ka jingkyrmen da ka namjop; kiew kyrdan ka Nongrim Hills ba pynliem ïa ka Nongthymmai

Shillong, Rymphang 24: Ka Shillong Lajong FC ka la pynkhie-im ïa ka jingkyrmen ha ka jingïaknieh ban rah ïa ka nam lahduh jong ka OC Blue Shillong Premier League 2024 da kaba pynliem ïa ka Nangkiew Irat da 4-0 ha madan First Ground – SSA Stadium, Polo, ha ka sngi Nyngkong.
Kawei pat ka jingïalehkai ha kane ka sngi la sakhi ïa ka Nongrim Hills SC kaba la pynliem ïa ka Nongthymmai SC da 2-1 bad kiew sha ka kyrdan kaba hynñiew ha ka miej.
U Deibormame Tongper (60’, 68’), u Yohaan Benjamin (69’) bad u Riborlang L Lyngkhoi (75’) ki la pynkhihjar na bynta ka Shillong Lajong, ha kaba baroh saw tylli ki kol ki la wan tang hapoh 15 minit ha ka kylla miet.
Hadien kane, u Nickhil Lyngkhoi (37’) u la buh hakhmat ïa ka Nongrim Hills tang ban shah pynïakhaid noh ha u Pynshailang Kharduid (45’+2) na bynta ka Nongthymmai. Nangta u Bankitboklang Nongrum u la ïoh ban thep ïa ka kol pynjop ha ka minit kaba 88.
Mynta ka SLFC ka sahdien da tang 2 poiñ na ka Mawlai SC kaba lamkhmat ha khlieh duh (38 poiñ la 36 poiñ) hynrei ka Mawlai ka dang don ïa ka jingïalehkai ha kti.
Ka namjop ka la kyntiew shi kyrdan ïa ka Nongrim Hills sha ka kyrdan ba hynñiew, da kaba bujli ïa ka Sawmer SC, katba ka Nongthymmai ka dang ïaineh ha ka thup kyrdan ban shah pynhiar (relegation zone), kata ha ka kyrdan ba khyndai. Ka Nangkiew Irat ka dang neh ha ka kyrdan kaba hynriew bad ka lamkhmat tang 1 poiñ hakhmat ïa ka Nongrim Hills mynta, watla ka don sa ka jingïalehkai ha kti.
Hadien ka jingïakhun kaba khlem lah thep kol, ka jingïalehkai kaba ha ka por mynstep kynsan kynsan ka la shongshit da ka jinglah ban ïalehkai stet ki rangïalehkai ba shakhmat jong ka Lajong ban pashat bad pynrung bol shakhmat. U Deibormame u la ïoh ban lamkhmat da kaba pynkhih ïa ar tylli ki kol tang ha ka khyllipmat kaba tang 8 minit, ha kaba nyngkong u la thep ha ka minit kaba 60 bad bud sa kaba ar ha ka minit kaba 68. Kane ka la pynlong ïa u Deibormame – ban wan hakhmat eh kum u nongthep kol ba bun tam ha ka OC Blue SPL 2024 – na bynta kane ka samoi, da kaba kynjoh sha ki 19 tylli ki kol.
Ka jingïaibteng jong ka Lajong ban tehlakam bad ñion shakhmat ka la pynlong ïa ka Nangkiew Irat ba kan thait hi jai bad ki jingbakla ki la sdang ban jia hapoh u pud jong ki rangïalehkai ba shadien.
U Yohaan u la lah ban bsut da kaba suk ïa ka lynti jong u na ka liang kadiang shuwa ban pynkhih ïa ka kol kaba lai. Kane ka dei ruh ka kol kaba 50 ïa ka Lajong mynta ka samoi. La sakhi biang ïa kawei ka kol ha kane ka jingïalehkai, ha kaba u Restom Khriam u aiti ïa ka bol khlem da tip bad kane ka la ai lad ïa u Riborlang ban kyntiap nalor ïa ka bol sha kol.
Ka jingïalehkai kaba ar ka la long kaba jur bha haduh kaba kut namar ka long hapdeng ar tylli ki kynhun kiba kham poh kyrdan mynta u snem. Ka Nongrim Hills ka la ïoh kham bun tylli ki kabu ha ka kylla step, ba kynthup ïa ka jingpyrshang na u Oresterwell Langshiang ba la shah khanglad ha u Akash Thapa (rangap kol ka Nongthymmai) bad kawei na free kick jong u Onyxson Buhroy. U rangap kol ka Nongrim Hills – u Kitboklang Marbaniang u la bteng ban long ka kut kaba skhem na bynta ka kynhun, da kaba ïada ïa lai tylli ki kabu ksiar ban pynsngewsih ïa ka Nongthymmai.
Ka kol kaba nyngkong hadien ka corner kick. U Akash u la pyshang ban ïada hynrei u Nickhil u la don hajan bad pynkhih ïa ka kol. Ka Nongthymmai ka la ïohlad ban pynïakhaid shuwa ban kut ka kylla step, hynrei, u Kitboklang u la ïoh biang ban pynthikna ïa ka namjop ha ka 88 minit na bynta ka Nongrim Hills.
Ki don ar tylli ki jingïalehkai kiba itynnat bha ba la buh ban long mynta ka sngi Hatmajai. Kaba nyngkong, ha ka por 11 baje mynstep, ka Langsning FC pyrshah ïa ka Laitkor SC ha kaba kine ki kynhun ki bat ïa ka kyrdan ba san bad ba saw marïabud. Nangta, ha ka por 3 baje nohphai sngi, kan don ka jingïakhun ka ban pynjaw dud hapdeng ka Mawlai bad ka Rangdajied United FC, kaba wan kyrdan ba lai.
Ka nam rem kan mut ba ka lad jong ka Rangdajied ka la kut noh ban rah ïa ka nam lahduh jong ka OC Blue Shillong Premier League mynta u snem.