Pynliem ka Ri-Bhoi DCA ïa ka South Garo Hills DCA, san wicket khur ka Ankita

Shillong, Nailur 14: Ka Ankita Sharma ka la ïoh ban khur ïa ka namtam lyngba ki san wicket ban btin lynti ïa ka Ri-Bhoi District Cricket Association sha ka namjop ha ka jingïakhun pyrshah ïa ka South Garo Hills DCA ha ka semifinal ba nyngkong jong ka Meghalaya Cricket Association’s U-19 Girls Inter District Cricket Tournament ha ka jingïalehkai kaba la long ha Umbuda Ground, Nongpoh, hynne ka Sngi Palei.
Haba phai sha ka kynhun ki thei ka Ri-Bhoi ka la ïoh ban wan ha ka kyrdan ba nyngkong napoh ka Zone 1 jong ka Group A, katba ka South Garo Hills ka dei ka kynhun ba nyngkong na ka thup jong ka Zone 2.
Haba phai sha ka jingïakhun hynne ka sngi, ka SGH ka la jop ïa ka toss bad ki la jied ban tied nyngkong hynrei phewse ka jingïalehkai kam shym la ïaid katkum ka jingkwah ka SGH ha kaba baroh ki wicket ki la shah pynhap tang hapoh 18.4 over bad ïoh kamai tang 77 ron.
Ka Ankita, thei kawangbol jong ka Ri Bhoi ka la ïoh ban khur wicket tang mar ïasdang hynrei la shah khanglad noh ha ka Ronjoli Basumatary bad ka Marme M Sangma kiba la kamai mar 14 ron, katba ka Jaylynn R Marak ki la ïoh ban kynjoh tang 13 ron. Arngut napdeng kine, ki la shah pynhap noh lyngba ki bol jong ka Ankita, katba kawei la shah pynhap noh ha ka Bimala Thakur (1/18).

Shuh shuh, na ka liang jong ka Angelica Maring ruh ka la ïoh ban khur 3/24 kaba la long ka jingïarap na ka bynta ka kynhun, katba ka Bancyful Mynsong (1/6) ka la khur i wei. Kumba ka paw, ki thei ka Ri-Bhoi ki la lah ban tehlakam ïa ka jingïakhun naduh ka pali kawangbol, bad ailad tang 26 ki extra.
Katba na ka liang jong ka SGH ka la pynsepei da kaba ailad haduh 49 tylli ki extra, kaba la ïarap shibun ïa ka Ri-Bhoi, kaba la lah ban pyndep ban beh ïa katei ka thong ba la bud da 3 wicket kiba dang sah na ki 29.2 bad pynsah sa 35 bol.
Tang ka Angelica marwei kaba la ïoh ban kynjoh sha ka phew ron na ka bynta ka kynhun.
Na ka liang jong ka SGH, kaba la jop baroh ar sien ki jingïalehkai napoh ka Zone, ki la lehkai bha ha ba ïadei bad ka bol hynrei kim shym la lah ban tehlakam ïa ki extra, bad ka Rikmanchi M Sangma ka la khur 2/13, ka Jaylynn bad Dianchidora N Sangma baroh arngut ki la khur 2/21, ka Marme 1/13. Haduh mynta, ka Rikmanchi ka thei kawangbol ba seisohtam da 10 wicket na ki saw sien ïakhun.
Lyngba kane ka namjop, ka Ri-Bhoi ka la ïoh ban rung sha ka final bad kan dang hap ban ap ïano ba kan aireng ha ka final ha kaba ïa ka jingïakhun semi final ba ar kan long mynta ka sngi hapdeng ka Shillong Cricket Association (lahduh na ka Zone 1’s Group B) pyrshah ïa ka Tura DCA (runners-up of Zone 2).