Shillong, Nailur 11: Ka kynhun ïalehkai jong ka Lamlynti (Madanlyngkhi) FC bad ka Mawpdang SC ki la ïoh ban khur ïa ka namjop ha ka jingïakhun jong ka lympung SSA U-20 4th DIVISION Football League 2023 kaba la long ha madan 3rd Ground hynne ka Sngi Balang.
Haba phai sha ka jingïakhun kaba nyngkong hapdeng ka Pynthorbah SC pyrshah ïa ka Lamlynti (Madanlyngkhi) FC, ka jingïalehkai ka la jam sha kaba kut ha kaba ka Lamlynti (Madanlyngkhi) FC ka la jop suk da 4 kol.
UBatskhem Thongnirit u la ïoh ban pynkhihjar haduh ar kol na ka bynta ka kynhun, ha ka minit ba 4 & 50. Katba ki ar kol pat la thep da u Deibor Tongper ha ka minit ba 46 nangta na u Ricky Mawlong ha ka minit ba 59.
Ha ka jingïalekai kaba ar, ka Riatsamthiah SC ka la mad ïa ka namrem salit da1 – 2 kol ha ka Mawpdang SC.
Ha kane ka jingïakhun, dei ka Mawpdang SC kaba la sdang ban nyngkong ban pynkhihjar lyngba ka kol na u Wellborn Syiem- ha ka minit ba 35 hynrei ka Riatsamthiah SC ka la ïoh ban pynïakhaid na u Banjop Thabah ha ka minit ba 45.
Hadien katto katne por ba la ïaid ka jingïakhun ha ka kylla kaba ar, u Patsha Syiem jong ka Mawpdang SC u la ïoh ban pynbud sa ïa ka kol kaba ar kaba la ïarap ïa ka kynhun ban khur ïa ka namjop.
Ka jingïalehkai mynta ka sngi kan sdang biang kumba ju long, kata ha ka por 3:15 nohphaisngi, ka Risa Colony SC kan aireng pyrshah ïa ka Mawlyngngad SC, bud sa ka jingïakhun kaba ar ha ka por 4:45 janmiet hapdeng ka Diengpasoh SC ka ban aireng pyrshah ïa ka Mawkriah West SC, ha madan 3rd Ground, MFA Turf Polo.
