Pynliem ka kynhun na Meghalaya ïa ka US Grigny FC da 4-0 kol

Nongpoh, Lber 26: Ka long ka jingsarong ïa ka jylla Meghalaya, ha kaba ka kynhun ïalehkai na ka jylla ka la lah ban khur ïa ka nam jop, da kaba ka la pynliem noh ïa ka US Grigny FC da 4-0 kol, haba ïa aireng ha ka jingsdang ka 2nd Edition ka Indo-French Football Tournament 2025 kaba la long ha Nongbah Paris ha ka 25 tarik u Lber 2025.
Kum ban pynkynmaw, ka kynhun ba mih khmat na Meghalaya na ka bynta ri Indai ka dei ka kynhun ïalehkai na ka Mynken Higher Secondary School Bhoirymbong, Ri Bhoi District.
Ha ka jingïa aireng ha ka sngi ba sdang katei ka tournament, la iohi ba ka jingïakhun ka long kaba kham pher bha bad ym poi pyrkhat ba ka kynhun na Meghalaya kaba mihkhmat ïa ka ri India kan lah ban ïalehkai bha kaba la pynlyngngoh ïa kiba sakhi ïa kane ka jingïalehkai. Ka kynhun ïalehkai na France ruh kam poi pyrkhat ba ka kynhun na India ka lah ban ïalehkai bha, kaba dei ka jingpyni sap ka kynhun na Meghalaya kaba mihkhmat ïa ka ri India.
Kaba pynlyngngoh bad kaba pynsah jingkynmaw, haba sakhi ïa kane ka jingïakhun ka Meghalaya bad ka US Grigny FC, ka dei kajingdon lang naduh u Deputy Mayor of Sports, u Deputy Mayor ka Grigny bad u Director ka ka sports, ha kaba ka jingïalehkai bha ka kynhun na Meghalaya ka la pynshohbiej ïa kitei ki heh nongpeit nongkhmih kane ka tournament.
Kane ka jinglah ban pynrem ka kynhun na Meghalaya ïa ka US Grigny FC kam dei satia tang kata ka jingjop kaba long ka jingsarong, hynrei ka pyni ba ka kynhun ïalehkai ka India ba la mihkhmat da ka kynhun na Meghalaya kan pynsah jingkynmaw ha kum kane ka jingïakhun kaba la dei ha ka kyrdan International. Kane ka jingïalehkai bha ka kynhun na Meghalaya kan pynshisha ba ka kynhun ka ri India ka lah ban ïa aireng sha kine ki lympung ba la paw ha ka pyrthei ba ki don ki European Club kuba la paw bha ha ka kam ïalehkai phutbol.
Hadien kane ka jingjop, ka kynhun na Meghalaya ka la dang kham ban khia ban ïalehkai bha ha kawei pat ka wat ba kan ïakhun pyshah ïa ka Versailles FC ka ban long mynta ka sngi ka 26, u Lber 2025. La ïathuh ruh ba ka Versailles FC ka dei kawei na ka kynhun ba khlain bha ha ka ri France.
Shuh shuh, kane ka Indo-French Football Tournament, ka la dei ruh ka rynsan ba ka kynhun na India ka pyni ïa ka jingkotbor jongka lyngba ka jingdon ki samla don sap na Meghalaya bad ka long ruh kawei na ka bynta ban dang pynkhlaiñ ïa kajingïalehkai sport ha ka phutbol hadpeng ka India bad ka ri France.
Hadien kane ka jingjop kaba khraw, ka kynhun ïalehkai ka Meghalaya mynta kan phai pat ban pynkhreh ïa ka jingïakhun kaban wan pyrshah ïa ka Versailles FC. Ka Versailles FC ka dei kawei na ki klob ba khlaiñ bor ha France, bad la khmihlynti ba kane ka jingïakhun kan long kaba itynnad bad kaba kham jwat ïa ki khynnah ka Jylla.