Ban shngaiñ ki paidbah ha ka leit ka wan bad ban ïakhun pyrshah ban lait na ki jingjia basngewsih ka tnad Pulit Ri Bhoi lyngba ka Traffic Branch na ka por sha ka por ka shimkhia ban tehlakam ïa ki jingpynkheiñ aiñ ki nongñiah kali, hynrei katba dang teh pyrkhing dang bun pat ki bym suidñiew bad kiba ym burom ïa ki kyndon jong ka Motor Vehicle Act.
Kum ban pynkynmaw, ka tnad Pulit na Ri Bhoi manla u snem ka ju pynlong ruh ïa ki jingai jinghikai bapher bapher pynsngewthuh ïa ki ñongñiah kali kamai bad la ju rakhe ïa ka ‘Road Safety’ bad ka long pat kaba sngewlyngngoh ba dang duna bha kiba don ka jingkitkhlieh ban ïa trei lang bad ka tnat Pulit na ka bynta ban ïada na ki jingjia ba sngewsih ha ka surokbah National Highway-6 ha Ri Bhoi District.
Kane ka jingteh pyrkhing ka tnat Pulit na Ri Bhoi, ka kham ban khia ha kane ka surokbah National Highway-6 ha Ri Bhoi, kata naduh Khanapara haduh ha Umïam. La ju sakhi ne iohi ruh ha ki lad pathai khubor, ki jingjia ba sngewsih kum ka jingmynsaw bad ka jingïap ka ju jia beit khah khah ha kane ka surokbah bad dei namar kane ka daw ka tnat Pulit na Ri Bhoi ka ïaleh ban pyrshang ban ai jinghikai bad ruh ban pynsngewthuh ïa ki paidbah bad phewse, bunsien ka jingïakhun ka tnat Pulit teng teng ka pynduh mynsiem noh ïa ki, namarba bun kiba ym ai ka jingïatrei lang.
Ha kine ki sngi, ka tnad Pulit na Ri Bhoi ka la ju pyrkhing bha hajan shi lynter ka surokbah National Highway-6 lyngba ki Police Station bad ki Police Outpost ba talasi ne bat ïa ki kali ba pynkheiñ aiñ bad ka daw ka long ba kum ka tnad Pulit ka ïaleh ban tehlakam da ka jingthmu ban pynduna ïa ki jingmynsaw ne ki jingjia ba sngewsih kaba dei tang na ka daw ka jingbym burom ïa ki kyndon aiñ ka tnad Traffic bad ruh ka Motor Vehicle Act.
La ju sakhi ruh ki Pulit ka Ri Bhoi lyngba ka tnat Traffic, ki ïaleh ban tehlakam da kaba daiñ kuna ruh ïa ki kali heh, ki kali rit bad ki kali ar shaka da kaba pyntreikam ïa ka Motor Vehicle Act, la bun ruh kiba shah daiñ kuna bad haba phai pat ïa kata ka jingïatrei kam la iohi ba dang bun ki paidbah kiba ym rung kata ka jingmut jingpyrkhat halor kata ka jingdonkam ban shim ïa kita ki lad jingïada ban lait na ki jingmynsaw ne ki jingïap kiba dei tang na ka daw ka ñiah thurmur ïa ki kali khlem da bun ïa kita ki kyndon.
Ka khubor kaba kham sngewkhia ka long, ba don ki khep ki khep ba ki Pulit ki pyndep ïa la ki kamram ban tehlakam ïa ki Kali ba pynkheiñ aiñ kum ka jingñiah kali ha ka jingbuaid kiad, ka jingbym deng ïa ki Helmet, ka jingbym pyndait ïa ki Seat-belt bad tang shu bat ki Pulit la don ruh kiba wan tuklar ban phah pynlait noh. Lada ka long ha kane ka rukom ïano yn kynnoh lada mih ki jingmynsaw ne ki jingïap. Kaba khatduh bun ka jingkynnoh sha ki bor Pulit bad lada ki leh ïa kaba bha ruh bun ki bym kyrshan bad lada ki pyrkhing ïa ka aiñ ruh ki shah kynnoh kylla te hadei kata ka thong ban ïakhun pyrshah ïa kita kiba pynkheiñ aiñ, mih ka jingkylli.
Namarkata, ka la dei ka por ba la donkam ban don ka jingïatrei lang na baroh ki liang ban shim ïa ki lad jingïada ban lait na ki jingjia ba mynsaw bad ki jingïap, kiba dei tang na ka daw ka jingpynkheiñ ïa ki aiñ ñiah kali bad lada ki paidbah, ki nongïalam ne ki riew shimet kim sngewthuh ïa ka jingthmu ka jingteh pyrkhing, kan ym myntoi ban trei tang ka bor Pulit bad kaba kham sngewsih pat lada jia kiei kiei kiba mynsaw ne ïap ïano ngin kynnoh, mih kata ka jingkylli.
Shuh shuh, kum ban kyrshan ïa ka tnad Pulit na Ri Bhoi, ki ju pynsngew ïa kane ka sha ki nongïalam shnong, ki kynhun ñiah kali bad wat sha ki nongñiah Kali ban ïa trei lang na ka bynta ban pynduna ïa ki jingmynsaw ne ki jingïap bad lada kam don hi kata ka jingïatrei lang ka long shisha kaba eh ban shim ïa kita ki lad jingïada lada ngi dang long kita kiba pynkheiñ ïa ki kyndon aiñ ñiah kali.
